دوای 10 ساڵ، عێراق کۆتایی بە کارەکانی "ناوەندی هەواڵگریی چوارقۆڵی" دەهێنێت

ئاڤا نیوز

لیژنەی ئاسایش و بەرگری لە پەرلەمانی عێراق بە فەرمی کۆتاییهاتنی کارەکانی "ناوەندی هاوکاریی هەواڵگریی چوارقۆڵی" ڕاگەیاند، کە هەریەکە لە عێراق، ئێران، ڕووسیا و سووریای لەخۆدەگرت.

چیرۆکی سەرەکی: بە ئامانجی هەماهەنگی و ئاڵوگۆڕی زانیاری هەواڵگری سەبارەت بە جووڵەکانی ڕێکخراوی داعش لە نێوان عێراق و سووریا، ناوەندی هاوکاریی هەواڵگریی چوارقۆڵی لە ئەیلوولی ساڵی 2015 لە بارەگای وەزارەتی بەرگریی عێراق بە بەشداریی نوێنەرانی ڕووسیا و ئێران دامەزرا.

لێدوانی فەرمی: عەلاوی نیعمە، ئەندامی لیژنەی ئاسایش و بەرگری لەپەرلەمانی عێراق ڕایگەیاند: بەهۆی باشتربوونی توانای دەزگا ئەمنییەکان و پێشکەوتنی سیستەمی ئاڵوگۆڕی زانیاری لە دامەزراوە نیشتمانییەکاندا، ناوەندەکە بە فەرمی کۆتایی بە ئەرکەکانی هێناوە، ئەمەش جگە لە کەمبوونەوەی ئەو مەترسییانەی کە لە کاتی خۆیدا هۆکاری دامەزراندنی بوون.

زانیاریی زیاتر: ئەو پەرلەمانتارە ئاماژەی بەوەشکرد، بڕیاری کۆتاییهێنان بە کارەکانی ناوەندەکە بە ڕێککەوتنی وڵاتانی ئەندام بووە و بەو مانایە نییە کە هاوکارییەکان دەوەستن، بەڵکو شێوازی هاوکارییەکان بەپێی دۆخی ناوچەکە گۆڕانکارییان بەسەردا دێت.

لەلایەکی دیکەوە:  چاودێران پێیان وایە، داخستنی ئەم ناوەندە ئاماژەیە بۆ خواستی عێراق بۆ سەربەخۆیی زیاتر لە بڕیاری ئەمنی و پشت بەستن بەو توانا تەکنیکی و مرۆییە پێشکەوتووانەی کە ئێستا دەزگا ئەمنییەکانی عێراق خاوەنین بۆ پاراستنی سنوورەکان و بەدواداچوونی پاشماوەکانی تیرۆر.