لە سۆران چوار منداڵ بە یەک سک لە دایکبوون

ئاڤا نیوز

لە حاڵەتێکی دەگمەندا، ئافرەتێکی سنووری ئیدارەی سەربەخۆی سۆران، دوای ئەوەی ماوەی چوار ساڵ چاوەڕوانی لەدایکبوونی منداڵ دەبێت، ئەمڕۆ بە یەک سک چوار منداڵی بوو.

چیرۆکی سەرۆکی: ئەمڕۆ پێنجشەممە 27-11-2025،  ئافرەتێکی تەمەن 28 ساڵان، لە نەخۆشخانەی لەدایكبوون و منداڵانی سۆران، بە یەک سک چوار منداڵی بوو، سێ لە منداڵەکان کوڕن و منداڵەکەی دیکە کچە.

لێدوانی فەرمی: د. ڕازیە تۆفیق، پزیشکی ئافرەتان و منداڵبوون کە لەماوەی دووگیانی تا لەدایکبوونی منداڵەکان سەرپەرشتی ئەم ئافرەتەی کردووە بە ئاڤا میدیای گووت، ئەم ئافرەتە چوار ساڵە شووی کردووە و منداڵی نەدەبوو، دوای سەردانیکردنی بۆ لای ئێمە دوای دوومانگ دووگیان بوو.

پزیشکە دەشڵێت: منداڵەكان بەڕێگەی سرووشتی لەدایكبوونە و هەریەکەیان 15 خولەک نێوانیان هەبوو لە کاتی لەدایکبوون. بەوپێیەی منداڵەکان پێشوەختە لە دایکبوون بە 29 هەفتە واتە حەوت مانگی، بۆیە لەژێر چاودێری پزیشکیدان، بەڵام تەندرووستیان باش و جێگیرە.