ڕێبەری باڵای ئێران: حکومەتەکەی ترەمپ شایستەی گفتوگۆ نییە

ئاڤا نیوز

ڕێبەری باڵای ئێران ئەو دەنگۆیانەی ڕەتکردەوە کە باس لەوە دەکەن ئێران پەیامی بۆ واشنتن ناردبێت و دەڵێت: حکومەتەکەی ترەمپ شایستەی گفتوگۆ نییە.

لێدوانی فەرمی: عەلی خامنەیی، ڕێبەری باڵای ئێران ڕایگەیاند، ئیدارەی ترەمپ شایستەی ئەوە نییە ئێران پەیوەندی لەگەڵدا ببەستێت یان هاوکاری بکات، هاوکات جەختی کردەوە کە ئەمریکا و ئیسرائیل نەیانتوانیوە ئامانجەکانیان لە شەڕی ئەم دواییەدا بپێکن.

- لە بەشێکی دیکەی قسەکانیدا وتی، ئامانجی ئیسرائیل لەو هێرشانەدا لاوازکردنی ئێران و دروستکردنی ئاژاوە و هێنانی خەڵک بوو بۆ سەر شەقامەکان بە مەبەستی ڕوخاندنی کۆماری ئیسلامی ئێران.

- سەبارەت بە قەیرانی ئابووری وڵاتەکەشی وتی، یەکێک لە مەترسی و زیانەکان بۆ وڵاتەکەمان بەفیڕۆدانە بۆیە پێویستە هەموو کەسێک خۆی لە بەفیڕۆدانی ئاو و نان و غاز و بەنزین و پێداویستییە گشتییەکان بەدووربگرێت.

باکگراوند: لە دوای کۆتایی هاتنی شەڕی 12 ڕۆژی نێوان ئێران و ئەمریکا و ئیسرائیل، دۆناڵد ترەمپ چەندین جار ڕایگەیاندووە، هێرشەکانی ئەمریکا بوونەتە هۆی لەناوبردنی تەواوەتی بەرنامە ئەتۆمییەکەی ئێران، بەڵام هێشتا قەبارەی زیانەکان بە تەواوی ئاشکرا نین.