خزمەتگوزارییەکی بانکی لە عێراق بە هۆی بلاک فرایدەیەوە لەکار دەکەوێت

ئاڤا نیوز

لەگەڵ دەستپێکردنی ئۆفەرەکانی بلاک فرایدەی (هەینیی ڕەش)،  ئەپڵیکەیشنی "سوپەر کی" (Super QI) لەناکاو لەکارکەوت و ئەمەش شەپۆلێک لە ڕەخنە و ناڕەزایەتیی بەکارهێنەرانی لێکەوتەوە.

چیرۆکی سەرەکی: ماوەی چەند ڕۆژێکە ئەپڵیکەیشنی "سوپەر کی" بانگەشە بۆ ئۆفەرێکی تایبەت دەکات، ئەویش کڕینی باڵانسی هەردوو کۆمپانیای ئاسیاسێڵ و زەین بە بەهای 25 هەزار دینار بەرامبەر تەنیا دوو هەزار دینار، بڕیاربوو ئۆفەرەکە لە کاتژمێر 12ـی شەو تا دووی بەرەبەیانی ئەمڕۆ هەینی 28-11-2025  بەردەوام بێت.

ئه‌وه‌ی ڕوویدا: سەرباری ئەو هەڵمەتە ڕیکلامییە گەورەیەی بۆ ئۆفەرەکە کرابوو، بەکارهێنەران تووشی شۆکبوون کاتێک لەگەڵ دەستپێکردنی کاتی دیاریکراو، ئەپڵیکەیشنەکە لەکارکەوت و نەیانتوانی هیچ باڵانسێک بەو نرخە دیاری کراوە بکڕن، ئەمەش بووە هۆی دروستبوونی ناڕەزایەتییەکی بەرفراوان لە تۆڕە کۆمەڵایەتییەکان.

ئه‌وه‌ی له‌باره‌یه‌وه‌ دەگوترێت: بەکارهێنەران داوا لە کۆمپانیای جێبەجێکاری ئەپڵیکەیشنەکە دەکەن هۆکاری ئەم لەکارکەوتنە ڕوونبکاتەوە و کێشەکە چارەسەر بکات، بەتایبەتی لەکارکەوتنی ئەپەکە لەو ساتانەدا ڕوویدا بەشداربووان چاوەڕێی دەستکەوتنی ئەو ئۆفەرە بوون.