ئۆجەلان دوو مەرج بۆ تێکەڵبوونی هەسەدە بە ئیدارەی نوێی سووریا دادەنێت

ئاڤا نیوز

 

گوڵستان کڵچ کۆچیغیت، ئەندامی دەمپارتی لە شاندی کۆمیسیۆنە پەرلەمانییەکەی تورکیا دەڵێت: ئۆجەلان بە پێویستی زانیووە کورد، تورکمان و چەرکەزەکان و پێکهاتەکانی دیکەی سووریا؛ دوای خۆڕێکخستنیان لە چوارچێوەی کۆمۆن، ئەنجوومەن و کۆمەڵی مەدەنی و بە تایبەتمەندییەکانی خۆیانەوە لەگەڵ سیستەمی حوکمڕانی سووریا یەک بگرن و بەبێ دیموکراسییەتیش ئەمە بەدی نایەت.

 

وێنە گەورەکە: دوای تێپەڕینی چەند ڕۆژێک بەسەر سەردانی شاندە سێ کەسییەکەی کۆمیسیۆنی یەکڕیزیی نیشتمانی، برایەتی و دیموکراسی بۆلای عەبدوڵڵا ئۆجەلان، ڕێبەری زیندانیکراوی پەکەکە، گوڵستان کڵچ کۆچیغیت کۆتایی بەو مشتومڕانە هێنا کە لەبارەی ناوەڕۆکی کۆبوونەوەکە لە میدیاکانی تورکیا بڵاو دەکرانەوە.

 

لێدوانی فەرمی: گوڵستان کڵچ کۆچیغیت، ئەندام لە شاندەکە و جێگری سەرۆکی فراکسیۆنی دەمپارتی لە پەرلەمانی تورکیا لەبارەی ناوەڕۆکی کۆبوونەوەکە بۆ ئاژانسی هەواڵی مێزۆپۆتامیا دوا و ئاماژە بەوە دەدات دۆخی سووریا و چارەنووسی هێزەکانی هەسەدە و ئیدارەی خۆسەر تەوەری سەرەکیی کۆبوونەوەکە بووە.

 

بە تەنیشت ئەم بابەتەوە: ئەو پەرلەمانتارەی دەمپارتی ئاماژە بەوە دەدات ئۆجەلان هۆشداری داوە لەوەی ئەگەر دیموکراسیی ڕاستەقینە لە سووریا بەدی نێیەت، ئیدارەی ئەحمەد شەرع'یش وەک ئیدارەی بەشار ئەسەد دەبێتە دیکتاتۆری، ئەمەش خۆشگوزەرانی و ئارامی بۆ سووریا بەدی ناهێنێت.

 

پێویستە ئەمەش بزانیت: کۆچیغیت سەرنجی خستە سەر ئەوەی ئۆجەلان تێکەڵبوونی هەسەدەی لەگەڵ حکومەتی سووریا و پابەندبوون بە ڕێککەوتنی 10ی ئاداری بە پێویست زانیووە و ئەمەی گرێ داوە بە دیموکراسیبوونی ئیدارەی سووریا و وتوویەتی: "دەکرێت هێزە چەکدارەکان لەگەڵ سوپا یەک بگرن، بەڵام لە هەمان کاتدا پێویستە هێزەکانی ئاسایشی خۆجێی بمێننەوە و ئەوان سەر بە وەزارەتی ناوخۆ بن.