دادگەھا تۆهمەتباران بوویەرا مێردینێ ل تورکیا ب سستی برێڤەدچیت

ئاڤا دیجیتاڵ

 

سالەک بسەر بوویەرا کوشتنا پێنج وەلاتیێن دهۆکێ ل باکوورێ کوردستانێ دەربازبوویە و کەسوکارێن قوربانیان دبێژن، دادگەھا تۆهمەتباران ب سستی برێڤەدچیت.

 

چیرۆکا سەرەکی: سالا بووری لسەر رێکا نسێبینێ بۆ مێردینێ ل باکوورێ کوردستانێ پێنج وەلاتیێن دهۆکێ کو ئەندامێن دوو خێزانان بوون، هاتنە کوشتن و هێشتا کەیسا وان ل دادگەهێن تورکیا نەهاتیە ئێکلاکرن.

 

داخویانیا فەرمی: هەتا ڤێگاڤێ پێنج کەس لسەر بوویەرا کوشتنا کەسوکارێن مە ھاتینە دەستەسەرکرن، بتنێ سێ رووینشتنێن دادگەھێ برێڤەچوونە، لێ دادگەهکرنا وان ب خاڤی بڕێڤەدچیت، چ بەلگەیەکا باش نەکەفتیە بەردەستێ دادگەھێ. حەربی جەلالەدین، کو برایەک و دایکا وی د وێ بوویەرێ دا هاتبوونە کوشتن ئەڤە بۆ ئاڤا میدیا گوت.

 

زانیاریێن زێدەتر: ژ کۆما پێنج کەسێن هاتینە دەستەسەرکرن، دوو ژ وان وەک تۆهمەتبارێن سەرەکی یێن بوویەرێ، سێ کەسێن دی ژی هەڤکاربووینە و تڕۆمبێل و چەک بۆ تۆهمەتبارێن سەرەکی دابینکرینە، بڕیارە چارەم ڕووینشتنا دادگەهێ ل 21 ئادارا ئەڤسالە بڕێڤەبچیت، ئەو دەنگێن تۆهمەتباران بگەھنە دادگەھێ کو ب ڕێکا ھێلێن پەیوەندیێ ھاتینە تۆمارکرن.

 

ژلایەکێ دیڤە: حەربی جەلالەدین گوت، سەرۆک بارزانی، سەرۆکێ ھەرێما کوردستانێ و سەرۆکێ حکومەتا ھەرێما کوردستانێ ڕۆلەکێ مەزن د ڤێ پرسێ دا ھەبوویە و ھاریکاربوونە بۆ دەستەسەرکرنا تۆهمەتباران، داخازێ ژی دکەن حکومەتا ھەرێما کوردستانێ زێدەتر ھاریکار بیت هەتاکو تۆهمەتبار بگەھنە سزایێ خۆ.

 

باکگراوند: ل شەڤا 18 سەر 19ـێ هەیڤا ئێک یا سالا بووری، لسەر رێکا نسێبین بۆ مێردینێ ل باکوورێ کوردستانێ، پێنج وەلاتیێن پارێزگەها دهۆکێ کو ئەندامێن دوو خێزانان و خزمێن ئێک بوون، کەفتە بەر ھێرشا چەند کەسان و تەقە لێ کرن و کوشتن، کو پێکدهاتن ژ دوو ژن و سێ زەلامان و ب مەرەما وەرگرتنا چارەسەریا نۆژداری قەستا باکوورێ کوردستانێ کربوون.