مەسرور بارزانی: پێکهێنانی کابینەی نوێ پێویستە لەسەر بنەمای ئەنجامەکانی هەڵبژاردن بێت

ئاڤا نیوز

سەرۆکوەزیران مەسرور بارزانی، دووپاتیکردەوە، ئێستا هەلومەرجێکی نوێ بۆ پێکهێنانی کابینەی نوێ هاتووەتە ئاراوە و پێویستە لەسەر بنەمای ئەنجامەکانی هەڵبژاردن بێت.

چیرۆکی سەرەکی: ئەمڕۆ سێشەممە 2-12-2025، سەرۆکوەزیران، مەسرور بارزانی، پێشوازی لە کریستۆفەر بۆوم، باڵیۆزی کەنەدا لە عێراق کرد.

ڕاگەیێنراوی فەرمی: ماڵپەڕی حکومەتی هەرێمی کورستان بڵاویکردووەتەوە، لە کۆبوونەوەی سەرۆکوەزیران، مەسرور بارزانی و باڵیۆزی کەنەدا، هەردوولا هاوڕا بوون لەسەر گرنگیی پتەوکردنی پەیوەندیی دوولایەنە، بە تایبەتی لە بوارەکانی وەبەرهێنان و ئاڵوگۆڕی بازرگانیدا.

لەلایەکی دیکەوە: لە بەشێکی دیکەی کۆبوونەوەدا، چاکسازییەکانی حکومەتی هەرێمی کوردستان لە کەرتە جۆراوجۆرەکاندا تاووتوێ کرا.

زانیاریی زیاتر: لەبارەی هەوڵ و گفتوگۆکانی پێکهێنانی کابینەی نوێی حکومەتی هەرێمی کوردستان، سەرۆکوەزیران، مەسرور بارزانی دووپاتی کردەوە، ئێستا هەلومەرجێکی نوێ بۆ پێکهێنانی کابینەی نوێ هاتووەتە ئاراوە و پێویستە لەسەر بنەمای ئەنجامەکانی هەڵبژاردن بێت.

ئەمەش بزانە: سەرکۆنەکردنی هێرشی تیرۆریستی سەر کێڵگەی کۆرمۆر و دۆخی گشتیی عێراق دوای هەڵبژاردنی ئەنجومەنی نوێنەران، هەروەها دوایین گۆڕانکارییەکانی سووریا و پرۆسەی ئاشتی لە تورکیا ، چەند تەوەرێکی دیکەی گفتوگۆکانی کۆبوونەوەکە بوون.

ئەوەی پێویستە بیزانیت:  ڕۆژی 20-10-2024، هەڵبژاردنی خولی شەشەمی پەرلەمانی كوردستان بەڕێوەچوو، دوای چەندین کۆبونەوە و ژمارەیەک گەڕی دانووستانی لایەنە براوەکانی هەڵبژاردن، هێشتا کابینەی نوێی حکومەتی هەرێمی کوردستان پێکنەهێنراوە و هەندێ لایەن کاریان بۆ ئەوە دەکرد، پێکهێنانی کابینەی نوێ بکەوێتە دوای هەڵبژاردنی پەرلەمانی عێراق، کە لە 11-11-2025 بەڕێوەچوو.

باکگراوند: لە کاتی بانگەشەی هەڵبژاردنی پەرلەمانی عێراق، سەرک بارزانی لە گوتارێکدا دووپاتی کردەوە، ئەو هەلومەرجەی پێش هەڵبژاردنی پەرلەمانی عێراق هەیە بۆ پێکهێنانی کابینەی نوێی حکومەتی هەرێمی کوردستان، لەدوای هەڵبژاردن ئەو هەلومەرجە نامێنێت.