ئاڤای خەڵک؛ کوێستانەکانی گوندی بێ گەڵاس کێشەی کارەبای نیشتمانی هەیە

ئاڤا نیوز

 

گوندی بێگەڵاس کە یەکێکە لە گوندە جوانەکانی دەڤەری پشدەر گرفتی نەبوونی کارەبای نیشتمانیان هەیە، بەڕێوەبەری گشتیی کارەبای ڕاپەڕینی دەڵێت، هەرکاتێک بودجە بەردەست بێت، دەستبەجێ کارەبا بۆ ئەو ناوچانە دابین دەکەن.

 

چیرۆکی سەرەکی: دانیشتووانی ناوچەکە کە زۆرینەیان سەرقاڵی ئاژەڵداری و کشتوکاڵن، بەدەست بێکارەباییەوە دەناڵێنن. عومەر ناسڕ، دانیشتوویەکی کوێستانەکانی بێگەڵاس بە ئاڤای گوت: "چەند ساڵێکە لێرەین، بەڵام کارەبای نیشتمانیمان نییە و بە ناچاری مۆلیدە یان فانۆس بەکاردەهێنین." هاوکات ئاماژەی بەوەش دا کە بۆ ڕاکێشانی ئاو و ئاودانی باخەکانیان پێویستییەکی زۆریان بە کارەبا هەیە.

لێدوانی فەرمی: عەلی محەممەد، بەڕێوەبەری گشتیی کارەبای ڕاپەڕین بە ئاڤای گوت، بەهۆی "کەمیی بودجە"وە نەیانتوانیوە کارەبای نیشتمانی بۆ کوێستانەکانی گوندی بێگەڵاس و دەڤەری پشدەر ڕابکێشن. ناوبراو دڵنیایی دا کە هەرکاتێک بودجە بەردەست بێت، دەستبەجێ کارەبا بۆ ئەو ناوچانە دابین دەکەن.

 

بەڕێوەبەری کارەبای ڕاپەڕین ڕوونی کردەوە کە کێشەکە تەنیا لە بێگەڵاس نییە، بەڵکو دانیشتووانی سنووری ناحیەکانی (ئیسێوە، هێرۆ و هەڵشۆ)ش بەدەست هەمان گرفتەوە گرفتارن. ئەم ناوچانە جگە لەوەی شوێنی نیشتەجێبوونن، وەک ناوچەی کشتوکاڵی و هاوینەهەواریش سوودیان لێ دەبینرێت.