باڵیۆزی یۆنان لە عێراق: خەبات گەلی کوردستان بووەتە ئەزموونێکی دەوڵەمەند بۆهەڵسانەوە و بەردەوامبوون

ئاڤا نیوز

 

سەرۆک بارزانی لەگەڵ باڵیۆزی گشتیی یۆنان لە عێراق کۆبووە. باڵیۆزی یۆنان ستایشی سەقامگیری و بوژاندنەوەی هەرێمی کوردستانی کرد، هەروەها ئاماژەی بە مێژووی خەبات و کۆڵنەدانی گەلی کوردستان کرد کە بووەتە ئەزموونێکی دەوڵەمەند بۆ دووبارە هەڵسانەوە و بەردەوامبوون.

 

چیرۆکی سەرەکی: ئەمڕۆ چوارشەممە 3-12-2025، لە پیرمام سەرۆک مەسعود بارزانی پێشوازی لە جۆرجیۆس ئەلەمانۆس، باڵیۆزی گشتیی یۆنان لە عێراق کرد. هاوکات نیکۆلۆس ستێرگیولاس، کونسوڵی گشتیی یۆنان لە هەولێر ئامادەی بوو.

 

زانیاریی زیاتر: لە دیدارەکەدا، باڵیۆزی یۆنان لە عێراق، ستایشی سەقامگیری و ئەو بووژانەوەیە کرد کە لە هەرێمی کوردستان هاتووەتە ئاراوە و ئاماژەی بە مێژووی خەبات و کۆڵنەدانی گەلی کوردستان کرد کە بووەتە ئەزموونێکی دەوڵەمەند بۆ دووبارە هەڵسانەوە و بەردەوامبوون.

 

هەر لەو دیدارەدا جەخت لە قووڵترکردنی دۆستایەتی و فراوانکردنی پەیوەندییەکانی نێوان هەرێمی کوردستان و یۆنان لە بوارەکانی ئابووری و کشتوکاڵ و کولتووری و ئاکادیمی کرایەوە.

 

ئەمەش بزانە: سەردانەکەی باڵیۆزی یۆنان لە عێراق بۆ لای سەرۆک بارزانی، بە مەبەستی ماڵئاوایی و کۆتاییهاتنی ئەرکەکەی بوو لە عێراق.