ژمارەیەک گۆڕی نەناسراو لە نزیک بەنداوی دووکان دەردەکەون

ئاڤا نیوز

 

لە دەوروبەری گوندی مەمەنداوە لە سنووری ناحیەی بنگردی سەربە قەزای دووکان ژمارەیەک گۆڕ دەرکەوتوون، دەگەڕێنەوە بۆ پێش دروستکردنی بەنداوی دووکان.

 

ئەوەی پێویستە بیزانیت: ساڵی ڕابردووش بەهۆی کەمبارانی و دابەزینی ئاستی ئاوی ڕووبار و بەنداوەکان و گرتنەوەی ئاوی زێی بچووک لەلایەن کۆماری ئیسلامیی ئێرانەوە لە چەند شوێنێک پاشماوەی شوێنی نیشتەجێبوون و گۆڕستان دەرکەتوون.

 

لێدوانی فەرمی: عوسمان کاکە سوار هاونشتمانیەکی گوندی مەمەنداوایە  بە ئاڤای گوت: ئەو شوێنەی گۆڕەکانی لێ دەرکەووتووە پێی دەڵێن: 'گردی عارەبان'، پێشووتر گوند بووە، ئەو کاتەی بەنداوی دووکان دروستکرا 58 گوندی ئەم ناوە چۆڵی کرد و خەڵکەکەی ڕۆیشتن، بۆیە ئێستا هیچ یەک لەو گۆڕانە ناناسرێنەوە هی کێن.

هاونیشتمانیانی ئەم ناوچەیە دەڵێن، بەشێکی گۆڕەکان تەمەنیان بۆ سەروو 100 ساڵ لەمەوبەر دەگەڕێتەوە، هەندێکیان گۆڕی خەڵکی بە تەمەنن و هەندێکیشیان مناڵن. بەشێک لە ئێسک و پرۆسکی گۆڕەکان شکاون، بەڵام بەگوێرەی ئەوەی ڕووەو قیبلە نێژراون، دەردەکەوێت سەرجەم گۆڕەکان هی خەڵکی موسوڵمانن.

بەگوێرەی بەدواداچوونی هەنگاو محەممەد، پەیامنێری ئاڤا بەهۆی دابەزینی ئاوی دەریاچەی دووکان، لە دوو شوێنی دیکەش گۆڕ دەرکەوتوون، کە ئەوانیش گۆڕستانی کۆنن.