حکومەتی کوردستان: خوێندنەوەی نەخوازراو بۆ سەردانەکەی سەرۆک بارزانی بۆ جزیرێ کرا

ئاڤا نیوز

 

لەبارەی کاردانەوەکانی سەردانی سەرۆک بارزانی بۆ شاری جزیرێی باکووری کوردستان، حکومەتی هەرێمی کوردستان ڕاگەیێنراوێکی بڵاوکردەوە و ڕایگەیاند، "بە پێویستی دەزانین هەموو لایەکمان هەوڵی ڕەواندنەوەی نیگەرانیەکان بدەین".

 

چیرۆکی سەرەکی: ڕۆژی 29-11-2025، چوارەم سیمپۆزیۆمی مەلای جزیری لە شرناخی باكووری كوردستان بەڕێوەچوو. سەرۆك مەسعود بارزانی بەشداری سیمپۆزیۆمەکەی کرد، دواتر دەوڵەت باخچەلی، سەرۆکی مەهەپە نیگەرانی خۆی دەربڕی لەبارەی چوونی پاسەوانەکانی سەرۆك بارزانی بە چەک و ئاڵای کوردستانەوە بۆ باکووری کوردستان، پاشان بارەگای بارزانی وەڵامی باخچەلی دایەوە.

 

ڕاگەیێنراوی فەرمی: دەقی ڕوونکردنەوەکەی حکومەتی هەرێمی کوردستان لەبارەی سەردانەکەی سەرۆک بارزانی بۆ باکووری کوردستان:

 

-سەردانی مێژوویی سەرۆک بارزانی بۆ پارێزگای شرناخ و دەڤەری جزیرە و بەشداریکردنی لە سیمپوزیومی مەلایێ جزیری و دەربڕینی پشتیوانی خۆیان بۆ پرۆسەی ئاشتی و ئەو پێشوازییە گەرمەی کە لەلایەن دامودەزگا فەرمییەکانی حکومەت و خەڵکی ناوچەکە لە بەڕێزیان کرا، جێگەی سوپاس و پێزانینە، بەڵام دواتر خوێندنەوەی نەخوازراو و دوور لە مەبەست، دڵگرانیی لێکەوتەوە. 

 

- "سەردەمێکی ناوازە لە پەیوەندییەکانی نێوان کۆماری تورکیا و هەرێمی کوردستان لە ئارادایە، پرۆسەی ئاشتی هەنگاوێکی دروستە لە چارەسەرکردنی پرسێکی گرنگ و هەستیار، دەستخۆشی لە حکومەت و حزبە دەسەڵاتدارەکانی تورکیا و هەموو لایەک دەکەین کە ڕۆڵی کاریگەریان هەبووە لە بەرەوپێشبردنی ئاشتی وسەقامگیری لە تورکیا و ناوچەکەدا.

 

- "هەموو لایەکمان هەوڵی ڕەواندنەوەی نیگەرانیەکان بدەین و جەخت لە قووڵترکردنی پەیوەندییەکان و بەدیهێنانی ئاشتەوایی و سەقامگیری ناوچەکە بکەین."