سیستانی نامەیەکی چوارچێوەی هەماهەنگی وەرناگرێت و ڕەتیدەکاتەوە

ئاڤا نیوز

بەگوێرەی ڕۆژنامەیەکی ئیماراتی، عەلی سیستانی، مەرجەعی باڵای شیعەکان، نامەیەکی فەرمی تایبەت بە لیستی کاندیدان بۆ پۆستی سەرۆکوەزیرانی داهاتووی عێراق لە سەرکردەکانی چوارچێوەی هەماهەنگی وەرنەگرتووە و ڕەتیکردووەتەوە.

وێنە گەورەکە: ڕۆژنامەی عەینی ئیماراتی،  لەزاری سەرچاوەیەکی تایبەتەوە ئاشکرای کردووە، سەبارەت بە کاندیدانی سەرۆکوەزیرانی داهاتووی عێراق، سەرکردەکانی چوارچێوەی هەماهەنگی نووسراوێکیان بۆ سیستانی ناردووە، بەڵام نووسینگەی مەرجەعی باڵای شیعەکان نامەکەی ڕەتکردووەتەوە و وەرینەگرتووە، جەختیشی کردۆتەوە کە مەرجەعییەت بە هیچ شێوەیەک دەست لە پرسی دەستنیشانکردنی سەرۆکوەزیران نادات.

زانیاریی زیاتر: بەپێی ڕۆژنامەکە، ئەو نامەیەی چوارچێوەی هەماهەنگی هەوڵی گەیاندنی داوە، نۆ ناوی بۆ پۆستی سەرۆکوەزیران تێدابووە، کە بریتی بوون لە هەریەکە :

•    محەممەد شیاع سوودانی (سەرۆکوەزیرانی ئێستا)
•    نووری مالیکی (سەرۆکی هاوپەیمانی دەوڵەتی یاسا)
•    حەمید شەتری (وەزیری هەواڵگری)
•    عەبدولئەمیر شەممەری (وەزیری ناوخۆ)
•    محەممەد ساحیب دەڕاجی (وەزیری پێشووتری پیشەسازی)
•    عەبدولحسێن عەبتان (وەزیری پێشووتری وەرزش و لاوان)
•    باسم بەدیری (سەرۆکی دەستەی لێپرسینەوە و دادپەروەری)
•    عەلی شوکری (سەرۆکی دەستەی ڕاوێژکاران لە سەرۆکایەتی کۆمار)
•    قاسم ئەعرەجی (ڕاوێژکاری ئاسایشی نیشتمانی)

لەلایەکی دیکەوە: لەبەشێکی دیکەی ڕاپۆرتەکە هاتووە، دوای ئەم هەڵوێستەی مەرجەعییەت، رەنگە چوارچێوەی هەماهەنگی ناچار بێت پێداچوونەوە بە تەواوی لیستی ئەو ناوانە بکات، یان بەدوای کەسایەتییەکی تەوافوقیدا لە دەرەوەی ئەو ناوانە بگەڕێت.