ئاڤای خەڵک؛ لە هەولێر دوای 13 ساڵ بەناوکردنی پارچە زەوییەک کێشەی تێدەکەوێت

ئاڤا نیوز

لە شارۆچکەی بەحرکە، هاووڵاتیەک بەر لە 13 ساڵ بەهۆی قەرەبووی ئاوارەبوونی زەوییەکی پێدراوە، دواتر فرۆشتوویەتی بە کەسێک، بەڵام ئێستا زەوییەکە بەناوی کەسەکە ناکرێت بە بیانووی ئەوەی ئەو هاووڵاتیە دووجار لە وەرگرتنی زەوی سوودمەند بووە.

زانیاریی بەدەستهاتوو: ڕەسوڵ حسێن شیخە پێشمەرگەی شۆڕشی ئەیلوول و گوڵانە، بە ئاڤای وت، بەهۆی ئاوارەییەوە هەموو موڵکەکانم لەدەستدا، بەڵام لە بەحرکە زەوییەکی کارتم وەکو ئاوارە پێدرا، منیش بەهۆی قەرزارییەوە 13 ساڵ پێش ئێستا فرۆشتم، ئەو کەسەی لێی کڕیم ئێستا چووەتە شارەوانی بەحرکە تا تاپۆی بکات، پێیانوتووە گوایە من دووجار سوودمەند بووم و زەوییەکەی بەناو ناکرێت.

من کوڕێکم شەهید بوو، 11 ساڵ پێش ئێستا لە ئامێدی خانوویەکمان پێدرا و منیش کردم بە ناوی هاوسەرەکەم، ئەم دوو بابەتە جیان و نابێت تێکەڵ بکرێن، من یەکجار سوودمەند بووم نەک دووجار.

لێدوانی فەرمی: مامەوەند عەبدولوەهاب، سەرۆکی شارەوانی بەحرکە کرد بە ئاڤای وت، پێویستە ئەو هاووڵاتییە بێت سەردانمان بکات، هەموو بەڵگەنامەکان لەگەڵ خۆی بهێنێت بەڵگەنامەی زەوییەکە کە وەکو ئاوارە پێیدراوە، لەگەڵ بەڵگەنامەی خانووەکە کە لەبری شەهیدانەی کوڕەکەی وەریگرتووە، بۆ ئەوەی وردبینی بۆ بکرێت، دڵنیاببینەوە کە دووجار سوودمەند نەبووە.

ئاماژەی بەوەشکرد، ئەگەر دڵنیابووینەوە دووجار سوودمەند نەبووە، ئەو کاتە زەوییە کارتەکە بەناوی کڕیارەکە دەکەین و کێشەمان نییە، ئەگەر دووجار سوودمەند بووبێ، ئەوا زەوییەکە بەناو ناکرێت.