تەریقەتی کەسنەزانی سکاڵا تۆمار دەکات

ئاڤا نیوز

گوتەبێژی تەریقەتی کەسنەزانی دەڵێت "دوای جەژن ڕوودەکەینە دادگە و سکاڵا لەسەر ئەو  بوهتان و ناوزڕاندنانە تۆماردەکەین کە دەرهەقمان کراوە".

چی ڕوویدا؟: ڕۆژی دووشەممە لە فڕۆکەخانەی نێودەوڵەتی بەغدا، کەمال کوبەیسی گوتەبێژی تەریقەتی کەسنەزانی و سەربەست حەمە ساڵح بەرپرسی پڕۆژە ئابوورییەکانی تەریقەتی کەسنەزانی دەستگیرکران، بەهۆیەوە گەشتی شێخ نەهرۆ کەسنەزانی بۆ سلێمانی چەند کاتژمێرێک دواکەوت، تاوەکو هەردوو هاوەڵەکەی بە کەفالەت ئازادکران.

ئەوەی پێویستە بیزانیت: ئەو ڕووداوە بەشێوەیەکی بەرفراوان بڵاوکرایەوە، گوایە دەستگیرکردنی ئەو دوو هاوەڵەی شێخ نەهرۆ بەهۆی جوڵاندنی هێز بووە بۆ سەر پاڵاوگەیەکی نەوت لە سنووری کەرکووک، گوتەبێژی تەریقەتەکە ئەو تۆمەتانە ڕەتدەکاتەو و دەڵێت، "سکاڵا تۆمار دەکەین."

لێدوانی فەرمی: "تیمی یاسایی تەریقەت دژی ئەو کەسانەی ئەو درۆیانەیان بڵاوکردووەتەوە، دوای جەژن لە بەغدا سکاڵا تۆماردەکەن و دڵنیاین لەوەی بڕیارەکان لەبەرژەوەندی ئێمە دەبن، چونکە تەریقەتی ئێمە لەسەر بنەمای ئاشتی و ئارامی بونیادنراوە." کەمال کوبەیسی گوتەبێژی تەریقەتی کەسنەزانی وایگوت.