زێلینسکی دەیەوێت پاڵپشتی لەندەن بەدەستبهێنێت

ئاڤا نیوز

لە چوارچێوەی هەوڵەکانی بۆ بەدەستهێنانی پشتگیریی بۆ وڵاتەکەی، ئەمڕۆ دووشەممە ڤۆلۆدێمیر زێلێنسکی، سەرۆکی ئۆکرانیا لە بەریتانیا دەبێت و لەگەڵ سەرۆکوەزیرانی وڵاتەکە کۆدەبێتەوە.

وێنە گەورەکە: هەوڵەکانی ئاشتی دوای پێشنیازەکەی دۆناڵد ترەمپ، سەرۆکی ئەمریکا بۆ کۆتاییهێنان بەشەڕی ڕووسیا و ئۆکرانیا چڕتڕبوونەوەتەوە و ئۆکرانیا لەگەڵ هەر یەکە لە ئەمریکا و هاوپەیمانانی تاتوێی پلانەکە دەکەن.

زانیاریی بەدەستهاتوو: ئەمڕۆ دووشەممە ڤۆلۆدیمیر زێلێنسکی لە لەندەن چاوی بە کیەر ستارمەر، سەرۆکوەزیرانی بەریتانیا دەکەوێت، تاتوێی پلانی ئاشتی دەکەن. 

ئەوەی لەبارەیەوە دەگوترێت: ستارمەر نەک تەنیا پێشوازی لە سەرۆکی ئۆکرانیا دەکات، بەڵکو پێشوازی لە هەر یەکە لە سەرکردەکانی فەرەنسا و ئەڵمانیا دەکات بۆ گفتوگۆکردن لەسەر دۆخی ئۆکرانیا، دەوترێت بڕیارە ئەو چوار سەرکردەیە باس لە هەنگاوەکانی داهاتوو بکەن لە ئەگەری هەر ڕێککەوتنێک.

لەلایەکی دیکەوە: هەرچەندە ئەمریکا و ئۆکرانیا لەبارەی دانوستانەکانیان جەختیان لەوە کردووەتەوە کە پێشکەوتن هەیە، بەڵام ترەمپ جارێکی دیکە ڕەخنەی لە زێلێنسکی گرت و وتی، هێشتا پێشنیازەکەی نەیخوێندووەتەوە.