ترەمپ: زێلینسکی پێشنیازی پلانی ئاشتی نەخوێندووەتەوە

ئاڤا نیوز

هەر چەندە دانوستانەکانی ئۆکرانیا لەگەڵ ئەمریکا بەردەوامن، بەڵام ترەمپ بێ ئومێدی خۆی بەرامبەر بە زێلینسکی دەربڕی و دەڵێت، پلانی ئاشتی نەخوێندوەتەوە، زێلینسکیش دەڵێت، گفتوگۆکان ئاسان نین.

چی ڕوودەدات: دوای سێ ڕۆژ لە دانوستانی ئەمریکا لەگەڵ شاندی ئۆکرانیا هەرچەندە دانوستانەکان بەبێ هیچ پێشکەوتنێک کۆتاییان هات، بەڵام کیێڤ بەڵێنیداوە بەردەوام  بێت لە کارکردن لەگەڵ ئەمریکا. هەر بۆیەش دۆناڵد ترەمپ، سەرۆکی ئەمریکا جارێکی دیکە ڕەخنە لە هاوتا ئۆکرانییەکەی دەگرێت و دەڵێت، دەبێت بڵێم کە من کەمێک نائومێدم سەرۆک زێلینسکی هێشتا پێشنیازی پلانی ئاشتی نەخوێندووەتەوە.

لێدوانی فەرمی: ڤۆلۆدیمیر زێلینسکی، سەرۆکی ئۆکرانیا ڕایگەیاند، گفتوگۆکان لەگەڵ نوێنەرانی ئەمریکا سەبارەت بە پلانی ئاشتی ئۆکرانیا بوونیادنەر بوون، بەڵام ئاسان نەبوون، لەگەڵ ئەمریکا بەردەوام دەبین لە کارکردن بە ئامانجی بەدەستهێنانی ئاشتییەکی دادپەروەرانە.

زانیاریی زیاتر: بڕیارە ئەمڕۆ دووشەممە زێلینسکی لە لەندەن لەگەڵ سەرۆکوەزیرانی بەریتانیا و سەرۆکی فەرەنسا و ڕاوێژکاری ئەڵمانیا کۆببێتەوە و تاتوێی پلانی ئاشتی و وەڵامدانەوەی بکەن.