بە هۆی بارانبارینەوە دابەشکردنی ئاو لە هەولێر بۆ نیوە دادەبەزێت

ئاڤا نیوز

لەماوەی 24 کاتژمێری ڕابردوو شەپۆلێکی بارانبارینی بەهێز ڕووی لە هەرێمی کوردستان کردووە و بە هۆی بەرزبوونەوەی ئاستی ئاوی زێی گەورە و لێڵ بوونی ئاوەکەی، دابەشکردنی ئاو لە بەشێک لە گەڕەکەکانی هەولێر بۆ نیوە دادەبەزێت. 

چیرۆکی سەرەکی: ماوەی دوو ڕۆژە شەپۆلێکی بارانبارین ڕووی لە هەرێمی کوردستان کردووە و بە هۆیەوە بەشێک لە سەرچاوە ئاوییەکان بەڕێژەیەکی بەرچاو ئاویان زیادی کردووە. 

لێدوانی فەرمی: ڕابەر حوسێن، بەڕێوەبەری بەڕێوەبەرایەتیی ئاوی هەولێر بە ئاڤای گوت، بەهۆی لێڵبوونی ئاوی زێی گەورە، ڕێژەی لێڵی ئاو گەیشتووەتە دوو هەزار (NTU) "پێوانەی ستاندارە بۆ ڕوونی ئاو". ئەمەش بووەتە هۆی وەستانی بە شێک لە وێستگەکانی پڕۆژەی ئاوی ئیفراز یەک، دوو و سێ و بەرهەمهێنانی ئاوی خاوێن بۆ نیوە دابەزاندووە.

- بەڕێوەبەری بەڕێوەبەرایەتی ئاوی هەولێر گوتیشی، لێڵ بوونی ئاوەکە کاریگەری لەسەر پڕۆژەی فریاگوزاری خێرای ئاوی هەلێریش کردووە و تێیدا بەرهەمهێنانی ئاو بۆ نیوە دابەزیوە بەڵام ئەگەری زۆرە لە 12 کاتژمێری داهاتوودا ڕیژەی لێڵی ئاو دابەزێت بۆ "هەزار ئێن تی یو" بەمەش بەرهەمهێنانی ئاو ئاسایی دەبێتەوە.