به‌هۆی بارانبارینه‌وه‌ گرفت لە كاره‌بای هەندێک شوێن دروست بووه‌ و چاره‌سه‌ر ده‌كرێت

ئاڤا نیوز

وەزارەتی کارەبا لەبارەی پچڕانی کارەبا لە هەندێک ناوچەکانی هەرێمی کوردستان ڕوونکردنەوە دەدات و دەڵێت: بەشێک لە وێستگە و فیدەرەکانی کارەبا لەگەڵ هاتنی بارانبارین تووشی شۆرتی کارەبا بوون و کێشەیان بۆ دروستبووە، بەڵام لە هەوڵداین بۆ چارەسەرکردنی.

وێنە گەورەکە: ماوەی دوو ڕۆژە شەپۆلێکی بارانبارین ڕووی لە هەرێمی کوردستان کردووە، ئەمەش کاریگەری دروستکردووە لەسەر پچڕانی کارەبا لە بەشێک لە ناوچەکان و هەوڵدراوە هەر زوو کێشەکە چارەسەر بکرێت.

لێدوانی فەرمی: وەزارەتی کارەبا بە ئاڤای ڕاگەیاند: هەر کاتێک شەپۆلێکی نوێی بارانبارین دەستپێدەکات، لە هەندێک شوێن کێشە بۆ کارەبا دروست دەبێت و دەپچڕێت، ئەمەش بەهۆی کۆنی وێستگەکانی کارەبا و فیدەرەکان، بۆ چارەسەری ئەم کێشەیە بەشێوەیەکی بنەڕەتی، دەبێت سیانە بکرێنەوە، بەردەوام وەزارەتی کارەبا لەسەر خەتە بۆ چارەسەرکردنی کێشەکان.

لەلایەکی دیکەوە: ئەندازیار بەختیار قاسم، بەڕێوەبەری گشتیی كارەبای هەولێر گوتی: ئێستا هیچ گرفتێک لە وێستگەکانی بەرهەمهێنان و گواستنەوەی کارەبا نییە، بەڵکو بەهۆی بارانبارین و دروستبوونی شۆرت لەسەر بەشێکی تۆڕەکانی دابەشکردنی کارەبا، ژمارەیەک گەڕەک و شوێن کارەبایان نییە، ئێستا تیمی هۆبەکانی چاککردنەوەی کارەبا سەرقاڵی کارکردن و دۆزینەوەی کێشەکانن، بۆئەوەی چارەسەری گرفتەکان بکەن و بەزووترین کات پێدانی کارەبا بگەڕێتەوە دۆخی ئاسایی خۆی. 

- سیروان محەممەد، وتەبێژی کارەبای سلێمانیش بە ئاڤای ڕاگەیاند، بەهۆی بارانبارین و دروستبوونی شۆرت لەسەر تۆڕەکانی دابەشکردنی کارەبا، 20 فیدەری کارەبا کێشەیان بۆ دروست بوو، بەهۆیەوە چەند شوێنێک بێ کارەبابوون، تیمەکانی چاککردنەوەی کارەبای سلێمانی بەشی زۆریشیان لە ئەرکدان و چارەسەرکردنی گرفتەکانیان کرد.

- ئەندازیار  شاکر مەحموود بەڕێوەبەری گشتیی كارەبای دهۆکیش بە ئاڤای ووتووە: هاوشێوەی شارەکانی دیکە بەهۆی بارانبارینەوە چەند گرفتێک هەبوو و زوو چارەسەر کران.

- لە پارێزگای هەڵەبجەش ئەو گرفتە تەکنیکیانەی بەهۆی بارانبارین دروست ببوون چارەسەرکران و دۆخی پێدانی کارەبای نیشتیمانی ئاسایی بووەتەوە.