دوو سەرکردەی سووننەکانی عێراق لەگەڵ میری قەتەر کۆبوونەوە؛ شایستەکان بە هەماهەنگی یەکلایی بکرێنەوە

ئاڤا نیوز

دوو سەرکردەی دیاری سووننەکانی عێراق سەردانی دەوحەیان کرد و لەگەڵ میری قەتەر کۆبوونەوە، لە کۆبوونەوەکەدا میری قەتەر ڕایگەیاندووە، بە گرنگی دەزانێت لایەنەکان بە هەماهەنگی یەکتری شایستە دەستوورییەکان تەواو بکەن.

چیرۆکی سەرەکی: محەممەد حەلبووسی، سەرۆکی حیزبی تەقەدووم و خەمیس خەنجەر، سەرۆکی پێشووی حیزبی سیادە لە دەوحە، لەگەڵ تەمیم بن حەمەد ئال سانی میری قەتەر و محەممەد بن عەبدولڕەحمان ئال سانی سەرۆکوەزیرانی ئەو وڵاتە کۆبوونەوە.

بڵاوکراوەی فەرمی: محەممەد حەلبووسی، سەرۆکی حیزبی تەقەدووم بڵاوی کردەوە، لە کۆبوونەوەکەدا پەیوەندییەکانی نێوان بەغدا و دەوحە و گرنگی یەکخستنی هەڵوێستەکان لەو پرسانەی جێگەی گرنگی پێدانی هاوبەشن باس کراون.

لە بەرامبەردا: میری قەتەر پیرۆزبایی سەرکەوتنی هەڵبژاردنی پەرلەمانی عێراقی کردووە و بە گرنگی زانیوە هێزە سیاسییەکانی عێراق بە هەماهەنگی یەکتریی شایستە دەستوورییەکان یەکلایی بکەوە، جەختیشی کردووەتەوە لەوەی قەتەر لە پشتیوانی ئارامی و خۆشگوزەرانی عێراق بەردەوام دەبێت.