ڕەوتی حیکمە: کاندیدمان بۆ پۆستی سەرۆکوەزیران نابێت

ئاڤا نیوز

ڕەوتی حیکمە بە فەرمی ڕایگەیاند،  هیچ کاندیدێکیان بۆ پۆستی سەرۆکوەزیرانی داهاتووی عێراق نابێت، ئەم ڕاگەیاندنەش لە کاتێکدایە گفتوگۆکانی نێو چوارچێوەی هەماهەنگی بە مەبەستی ڕێککەوتن لەسەر کاندیدێک چڕ بوونەتەوە.

بۆچی گرنگە: ئەم هەڵوێستەی ڕەوتی حیکمە کە عەممار حەکیم سەرۆکایەتی دەکات، بە هەنگاوێک بۆ کەمکردنەوەی کێبڕکێی توندی ناوخۆیی نێو چوارچێوەی هەماهەنگی، کە سەرەتا ناوی ژمارەیەکی زۆر کاندیدی تێدابوو پێش ئەوەی کەم بکرێنەوە دادەنرێت.

لێدوانی فەرمی:  فەهد جبوری، ئەندامی ڕەوتی حیکمە ڕایگەیاند: ئێمە نە لە ناوخۆ و نە لە دەرەوەی ڕەوتی حیکمە هیچ کاندیدێکمان بۆ سەرۆکایەتی وەزیران پێشکەش نەکردووە.

زانیاریی زیاتر: جبوری ئاماژەی بەوەشدا،  کۆدەنگیی ناو چوارچێوەی هەماهەنگی لەسەر کەسایەتی سەرۆکوەزیران، بڕیاری کۆتایی ئێمەیە و هیچ ناڕەزایەتییەکمان لەسەر ئەو کاندیدەی هەڵدەبژێردرێت نابێت. 

ئەمەش بزانە: سەبارەت بە میکانیزمی ڕێککەوتن لەسەر کاندێکی تەوافقی ، ئەو ئەندامەی ڕەوتی حیکمە ڕوونیکردەوە، گفتوگۆکان لەسەر نۆ کاندید بەردەوامە و چاوەڕوانی پەسەندکردنی ئەنجامی هەڵبژاردنەکان و دانیشتنی ئەندامانی پەرلەمانن بۆ ئەوەی کۆبوونەوەی یەکلاکەرەوە بۆ دیاریکردنی کاندیدی سەرۆکوەزیران ئەنجام بدەن.