هاکان فیدان: ئاواتەخوازین هەسەدە تێکەڵی ئیدارەی نوێی سووریا ببێت

ئاڤا نیوز

وەزیری دەرەوەی تورکیا لەبارەی ئەگەری تێکەڵبوونی هەسەدە لەگەڵ ئیدارەی نوێی سووریا، پێنج جار لەسەریەک دەڵێت "خوا یار بێت" و نیگەرانیی خۆی دەردەبڕێت لەوەی هەسەدە نایەوێت ئەمە بکات.

لێدوانی فەرمی: هاکان فیدان، وەزیری دەرەوەی تورکیا لە میانی چاوپێکەوتنێک لەگەڵ کەناڵی ئەلجەزیرە نیگەرانی خۆی دەردەبڕێت لەوەی ئێستا ئاماژەی نوێ دەرکەوتوون کە هەسەدە نایەوێت پابەند بێت بە ڕێککەوتننامەی 10ی ئادار و باس لەوە دەکات ئیسرائیل لە پشت ئەوەوەیە.

بە تەنیشت ئەم بابەتەوە: هاکان فیدان ئاواتەخوازە لە ڕێگای گفتوگۆوە کێشەکانی هەسەدە لەگەڵ ئیدارەی نوێی سووریا چارەسەر بکرێن و دەڵێت: بەم جۆرە کورد و عەرەب و سەرجەم هاووڵاتییانی سووریا لە ئارامیدا دەژین.

پێویستە ئەمەش بزانیت: وەزیری دەرەوەی تورکیا هەسەدە بەوە تۆمەتبار دەکات کە گوایە لەلایەن کاراکتەری دەرەوەی ناوچەکە ئاراستە دەکرێت و دەڵێت: ئەو ڕۆژەی ئیسرائیل و سووریا گەیشتنە ڕێککەوتن، داهاتووی هەسەدە دەبینین چی بەسەر دێت. شەڕ و پێکدادان لە بەرژەوەندی کەسدا نییە و زیان بە هاووڵاتییانی مەدەنی دەگات.

- هاکان فیدان هەروەها دەڵێت: خوا یار بێت هەسەدە بە ئەرکی سەرشانی خۆی هەڵدەستێت. خوا یار بێت هەسەدە وا ناکات. خوا یار بێت کێشەکە بە دیالۆگ چارەسەر دەبێت. خوا یار بێت کێشەکانی هەسەدە و ئیدارەی نوێی سووریا بە دیالۆگ چارەسەر دەبن. خوا یار بێت نابێتەوە شەڕ. خوا یار بێت پرۆسەکە بەرەوپێش دەچێت.