سوننەکانی عێراق بۆ گرووپە چەکدارەکان: پۆستی سەرۆکوەزیران وەرناگرن

ئاڤا نیوز

ئەنجوومەنی سیاسیی نیشتمانیی سووننە ئاشکرای دەکات، بە هەموو شێوەیەک دژی ئەوەن پۆستی سەرۆکوەزیرانی عێراق بدرێت بە کەسایەتییەک کە سەر بە گرووپە چەکدارەکان بێت و داوای وەرگرتنی وەزارەتی داراییش دەکات.

وێنە گەورەکە: بە مەبەستی دەستپێکردنی گفتوگۆ لەگەڵ لایەنە کوردی و شیعەکان، بڕیارە ئەنجوومەنی سیاسیی سووننە، کە دیارترین هێزە سووننییەکان لەخۆدەگرێت، لیژنەیەکی دانوستانکار پێكبهێنێت.

لێدوانی فەرمی: عەبدولخالق عەزاوی، سەرکردە لە هاوپەیمانیی سووننەکان ڕایگەیاند: بە توندی ڕەتیدەکەینەوە کەسێک لە گرووپە چەکدارەکانی بەرەی مقاوەمە پۆستی سەرۆکوەزیران وەربگرێت، هەروەها پشتیوانی لە هەڵوەشاندنەوەی ئەو گرووپە چەکدارانە دەکەین و داواش دەکەین چەک تەنها لە دەستی دەوڵەتدا بێت.

زانیاریی زیاتر: عەزاوی ئاماژەی بەوەش کرد، ئەنجوومەنەکە داوای وەزارەتی دارایی لە بری وەزارەتی ڕۆشنبیری دەکات، هەروەها لایەنە سوننەکان داوای پشکی پێکهاتەی سوننە لە پۆستە ئەمنییەکان دەکەن.