یەکەمین کاروانی نەخۆشانی تالاسیمیا گەڕانەوە هەرێمی کوردستان

ئاڤا نیوز

دوای ناردنی چوار کاروانی نەخۆشانی تالاسیمیا بۆ دەرەوەی وڵات و ئەنجامدانی نەشتەرگەریی، یەکەمین کاروان بە سەرکەوتوویی گەڕانەوە هەرێمی کوردستان.

وێنە گەورەکە: پێشتر لەسەر فەرمانی سەرۆکوەزیران مەسرور بارزانی، چوار کاروانی نەخۆشانی تالاسیمیا نێردرانە دەرەوەی وڵات بە مەبەستی نەشتەرگەریی چاندنی مووخی ئێسک، ئەمڕۆ هەینی 12-12-2025، یەکەم کاروان گەیشتەوە هەرێمی کوردستان.

لێدوانی فەرمی: د. سامان بەرزنجی، وەزیری تەندروستیی حکومەتی هەرێمی کوردستان، ڕایگەیاند، بە پاڵپشتیی سەرۆکوەزیران مەسرور بارزانی ئەم پڕۆژە مرۆڤدۆستییەی حکومەتی هەرێمی کوردستان سەرکەوتووانە دەستیپێکردووە و ئومێد و هیوای چاکبوونەوە و سەلامەتی خستۆتە ناو سەدان خێزان.

- ئاماژە بەوەش دەکات، ئێستا 172 هاوڵاتی هەرێمی کوردستان لە نەخۆشانی تالاسیمیا و بەخشەران و هاوەڵەکانیان دوای پشکنین و ئامادەکارییەکانی پزیشکی و ڕێکارەکانی زانستی لە کوردستان  لە دەرەوەی وڵاتن بە مەبەستی نەشتەرگەریی چاندنی مووخی ئێسک.

- وەزیری تەندروستی ڕوونی دەکاتەوە، تەواوی خەرجیەکانی چوون، هاتنەوە، مانەوە، پشکنینەکان، نەشتەرگەری، چارەسەرییەکان بوودجەی پێویستی بۆ دابینکراوە و لەلایەن وەزارەتی تەندروستی ڕەوانەی دەرەوەی وڵات کراون.

- وەزیری تەندروستی دەڵێت، یەکەمین کاروانی ئەو نەخۆشانە بریتین لە سێ تووشبووی تالاسیمیا، دوای مانەوەی نزیکەی 100 ڕۆژ، بە سەرکەوتوویی گەڕانەوە هەرێمی کوردستان و  گەیشتنەوە ماڵەکانی خۆیان.

زانیاریی زیاتر: ئاشکراشی دەکات، لەڕۆژانی داهاتوو کاروانی پێنجەم بۆ ژمارەیەک لە تووشبووان و هاوەڵەکانیان بەڕێ دەکرێن بۆ هەمان مەبەست.