لە نزیک تاڤگەی گەلی عەلی بەگ ڕووداوێکی هاتووچۆ ڕووی دا و حەوت کەس بریندار بوون

ئاڤا نیوز

لە نزیک تاڤگەی گەلی عەلی بەگ حەوت کەس بەهۆی ڕووداوێکی هاتووچۆ بریندار بوون. بەڕێوەبەری نەخۆشخانەی فریاکەوتنی سۆران دەڵێت: منداڵێکی تەمەن 11 ساڵان بەهۆی خوێنبەربوونی مێشک ڕەوانەی هەولێر کراوە.

چیرۆکی سەرەکی: ئەمڕۆ هەینی 12-12-2025، ڕووداوێکی سەختی ھاتووچۆ لە جۆری پێکدادان لەنێوان ئۆتۆمبێلێکی جۆری پیکاپ نیسان و نیسان سێنترا لە ڕێگای گەلیی عەلی بەگ، لە نزیک تاڤگەکە ڕووی دا و هێشتا هۆکارەکەی نازانرێت.

لێدوانی فەرمی: موحسین تەحسین، وتەبێژی هاتووچۆی سۆران بە ئاڤا میدیای ڕاگەیاند، لە ئەنجامی پێکدادانەکە، حەوت کەس برینداربوون، بەڵام هیچ حاڵەتێکی گیانلەدەستدان نەبووە.

- هێشتا ئەنجامی لێکۆڵینەوە لە ڕووداوەکە تەواو نەبووە، بەڵام ڕەنگە بەهۆی ناشارەزایی یان بەهۆی بارانبارین یاخود خێرایی هۆکاری ڕوودانی ڕووداوەکە بێت.

لەلایەکی دیکەوە: د. بەرەڤان سەباح یەحیا، بەرپرسی بەشی فریاکەوتنی نەخۆشخانەی ئاشتی لە سۆران بە ئاڤا میدیای ڕاگەیاند، شەش کەس لە بریندارەکان دۆخی تەندروستییان زۆر باشە و دوای چەند کاتژمێرێکی دیکە ڕەوانەی ماڵەوە دەکرێن، بەڵام یەکێک لە بریندارەکان بەهۆی خوێنبەربوونی مێشک دۆخی تەندروستی باش نیە  و گەیێنرایە نەخۆشخانەی فریاکەوتنی ڕۆژئاوا لە شاری هەولێر.

دەشڵێت، ئەو منداڵە لە کاتی پێکدادانەکەدا لە جامی ئۆتۆمبێلەکە دەرپەڕیوە، بۆیە تووشی خوێنبەربوونی مێشک هاتووە.