ئەو هاووڵاتیانەی بەهۆی لافاو بەڵگەنامەکانیان ون کردووە کارئاسانیان بۆ دەکرێت

ئاڤا نیوز

چەندین هاووڵاتی سنووری قەزای چەمچەماڵ بەهۆی لافاو بەڵگەنامەکانیان ون کردووە، وەزارەتی ناوخۆی حکومەتی هەرێمی کوردستان کارئاسانیان بۆ دەکات لە دەرهێنانەوەی بەڵگەنامە فەرمییەکانیان.

چیرۆکی سەرەکی: بەهۆی لافاوەکەی قەزای چەمچەماڵ و ناحیەکانی شۆڕش و تەکیە و ئاوچوونە ناو ماڵی دانیشتووان، بەشێکی هاووڵاتیان بەڵگەنامە فەرمییەکانیان ون کردووە، وەزارەتی ناوخۆی حکومەتی هەرێمی کوردستان بە گرتنەبەری چەند ڕێککارێک کارئاسانیان بۆ دەکات بۆئەوەی سەر لەنوێ بەڵگەنامەکانیان دەربهێننەوە.

لێدوانی فەرمی: د. هێمن میرانی، بەڕێوەبەری گشتیی دیوانی وەزارەتی ناوخۆی حکومەتی هەرێمی کوردستان بە ئاڤای گووت، هەموو ئەو هاووڵاتیانەی بەڵگەنامە فەرمییەکانی وەکو کارتی نیشتیمانی و پاسپۆرت و مۆڵەتی شۆفێری و ساڵیانەی ئۆتۆمبێل و هەر بەڵگەنامەیەکی دیکەیان ون کردووە، لەکاتی تۆمارکردنی ناویان لەلایەن تیمەکانی ناوەندی وەڵامدانەوەی قەیرانەکان، پێویستە ئاماژە بەوە بکەن بەڵگەنامەی ون کردووە، بۆئەوەی بەڕێوەبەرایەتییەکان ڕابسپێرین کارئاسانیان بۆ بکەن لە دەرهێنانەوەی بەڵگەنامەکانیان.

زانیاریی زیاتر: د. هێمن میرانی گوتیشی، بۆئەوەی هیچ تاوانێک بەو ناسنامە و بەڵگەنامە فەرمییانە ئەنجام نەدرێت کە ون بوونە، ئەو کەسانەی بەڵگەنامەی فەرمییان ون کردووە، پێویستە ناوی خۆیان لە پۆلیسی ونبووەکان تۆمار بکەن.