واشنتن گوشار دەخاتە سەر "چوارچێوەی هەماهەنگی" سەبارەت بە گرووپە چەکدارەکان

ئاڤا نیوز

گفتوگۆکانی پێکهێنانی حکومەتی نوێی عێراق بەرەو ئاڵۆزی زیاتر دەچن، چونکە هێزەکانی ناو "چوارچێوەی هەماهەنگی" سوورن لەسەر تەواوکردنی گفتوگۆکان سەبارەت بە ناسنامەی سەرۆکوەزیرانی داهاتوو، لەژێر فشاری زۆری ئەمریکادا کە داوا دەکات گرووپە چەکدارەکان لە گۆڕەپانی سیاسی دوور بخرێنەوە.

 

وێنە گەورەکە: زیاتر لە مانگێک بەسەر هەڵبژاردنی خولی شەشەمی پەرلەمانی عێراق تێدەپەڕێت، گفتوگۆی لایەنە سیاسییەکان لەبارەی یەکلاییکردنەوەی پۆستەکان بەردەوامە و تاوەکو ئێستا هیچ یەکێک لە کورد، سوننە و شیعە کاندیدی خۆیان بۆ پۆستەکان یەکلایی نەکردووەتەوە.

 

لێدوانی فەرمی: عامر فایز، سەرۆکی هاوپەیمانیی تەسمیم ڕایگەیاند، کۆبوونەوەکانی چوارچێوەی هەماهەنگی بەردەوامن "بۆ گەیشتن بە سازان لەسەر گونجاوترین کاندید بۆ سەرۆکایەتیی حکومەت". بەڵام جەختی کردەوە کە سەرکردەکانی گرووپە چەکدارەکان "بەشدارییان لە کۆبوونەوەی کۆتاییدا نەکردووە"، ئەمەش ڕەتکردنەوەیەکی ڕوونە بۆ ئەو ڕاپۆرتانەی باس لە بەشدارییان دەکرد. ئاماژەی بەوەشدا کە گفتوگۆی نێوخۆیی لەسەر کاندیدەکە "دوای تەواوکردنی سازان لەگەڵ هێزە نیشتمانییەکان یەکلایی دەکرێتەوە".

 

ئەوەی لەوبارەیەوە دەگوترێت: مارک ساڤایا، نێردەی سەرۆکی ئەمریکا بۆ عێراق، لە واشنتن ڕایگەیاند، وڵاتەکەی پێیوایە عێراق "ساتێکی یەکلاکەرەوە"ی بەسەردا دێت، جەختی لەوەش کردەوە کە "هیچ وڵاتێک ناتوانێت سەرکەوتوو بێت لە سایەی بوونی گرووپە چەکدارەکان کە کێبڕکێی دەوڵەت دەکەن". ساڤایا هۆشداری دا کە بڕیارەکانی قۆناغی داهاتوو دیاری دەکات کە ئایا عێراق بەرەو "سەروەری و هێز" دەڕوات یان "بەرەو هەڵوەشاندنەوە و پشێوی".

 

ساڤایا لە پۆستێکیدا لە پلاتفۆرمی "ئێکس"ڕایگەیاند، بەردەوامبوونی گرووپە چەکدارەکان لە دەرەوەی کۆنترۆڵی دەوڵەت "هەڕەشەیە بۆ پێگەی عێراق و ئابوورییەکەی خنکاندووە"، ئاماژەی بەوەشدا، ئیدارەی ئەمریکا ئامادەیە پشتگیریی بەغدا بکات "ئەگەر سەرکردایەتییەکی بەرپرسیار پابەند بێت بە بەهێزکردنی دامەزراوەکانی دەوڵەت".

 

لەلایەکی دیکەوە: جۆشوا هاریس، هەڵسوڕێنەری باڵیۆزخانەی ئەمریکا لە بەغدا، بە قاسم ئەعرەجی، ڕاوێژکاری ئاسایشی نیشتمانیی عێراقی ڕاگەیاندووە، پێویستە "ژێرخانی گرنگی وڵات لە هێرشی میلیشیاکانی سەر بە ئێران بپارێزرێت".

 

کاریگەری و لێکەوتەکان: ئەم هەڵوێستانە لە کاتێکدان کە ژێرخانی وزەی عێراق ڕووبەڕووی گوشاری زیاتر دەبێتەوە، دواترینیشیان هێرشکردنە سەر کێڵگەی غازی کۆرمۆر لە هەرێمی کوردستان لە کۆتایی تشرینی دووەمی ڕابردوو بە فڕۆکەی بێفڕۆکەوان، کە بووە هۆی وەستانی غازی وێستگە کارەباییەکان و زیانی ڕۆژانەی 7.41 ملیۆن دۆلار، بەپێی ڕاپۆرتی "ئیکۆ عێراق".

 

شیکارانی سیاسی پێیانوایە کە ئەم گوشارانەی ئەمریکا قورسایی زیاتر دەخاتە سەر چارەسەرکردنی دۆسیەی پێکهێنانی حکومەت لەناو چوارچێوەی هەماهەنگی.

ئەم دۆخە ئاڵۆزە سیاسییە لە عێراقدا پێویستی بە سازانێکی نیشتمانیی قووڵ هەیە بۆ تێپەڕاندنی فشارە دەرەکییەکان و دابینکردنی سەقامگیری بۆ وڵات، بەتایبەت لەم قۆناغە هەستیارەدا کە بریارە سیاسییەکان کاریگەرییەکی گەورەیان لەسەر داهاتووی عێراق دەبێت. چاوەڕوان دەکرێت گفتوگۆکان بەردەوام بن تا گەیشتن بە چارەسەرێکی گونجاو کە بەرژەوەندییەکانی گەلی عێراق لەخۆبگرێت.