وەزیری تەندروستی دەرمان و کەلوپەلی پزیشکیی گەیاندە چەمچەماڵ

ئاڤا نیوز

 

ئەمڕۆ کاروانێک دەرمان و پێداویستی لەلایەن وەزارەتی تەندروستی حکومەتی هەرێمی کوردستان گەیێندرایە نەخۆشخانەی چەمچەماڵ بۆ چارەسەرکردنی نەخۆشانی ناوچەکە و ئەو کەسانەی بەهۆی لافاوەکە زیانیان بەرکەوتووە.

 

وێنە گەورەکە: بەهۆی لافاوەکەی سنووری چەمچەماڵ ژمارەیەکی زۆر لە هاووڵاتیان زیانیان بەرکەوتووە و بریندار بوون، وەزارەتی تەندروستی دەرمان و پێداویستی بۆ چارەسەرکردنی هاووڵاتیان گەیاندە چەمچەماڵ و بەڵێندراوە ڕەوشی تەندروستی لە چەمچەماڵ بەرەوپێش ببرێت.

 

لێدوانی فەرمی: د. سامان بەرزنجی، وەزیری تەندروستی حکومەتی هەرێمی کوردستان، بە ئاڤا میدیای ڕاگەیاند، لەسەر ڕاسپاردەی سەرۆکوەزیران مەسرور بارزانی کاروانێک دەرمان و پێداویستی پزیشکیمان گەیاندە نەخۆشخانەی چەمچەماڵ، ئەوەی پێویست بێت بۆ هاووڵاتیانی ناوچەکە دابینی دەکەین، لە داهاتوو پلانمان هەیە گرنگی زیاتر بە کەرتی تەندروستی لە چەمچەماڵ بدەین، نەخۆشخانەیەکی نوێ دەکەینەوە و هەموو بەشەکانی تێدا بێت.

 

لەلایەکی دیکەوە: وەزیری تەندروستی، سەردانی ئەو کەسانەی کرد کە لە لافاوەکەی چەمچەماڵ زیانیان بەرکەوتبوو، پێویستیان بە چارەسەری پزیشکی هەبوو، بەڵێنیدا هەموو پێداویستییەکانیان بۆ دابین بکات.

 

زانیاریی زیاتر: د. سامان بەرزنجی، دەڵێت،  چیرۆکی ئەو کەسانەی ئاڤا نیشانیدان لەسەر تەندروستی هاووڵاتیان، ئەوەی پێویست بووە و پێویستی بە چارەسەری خێرا هەبووە پەیوەندیمان پێوەکردووە، ئەوەی دیکەش ئەمڕۆ سەردانی ئەو کەسانە دەکەین کە نەخۆشن، هەرچی پێویست بێت بۆیان دابین دەکەین.