وەزارەتی خوێندنی باڵا بڕیارێک لە بەرژەوەندیی قوتابیانی چەمچەماڵ دەردەکات

ئاڤا نیوز

ئێوارەی ئەمڕۆ وەزارەتی خوێندنی باڵا و توێژینەوەی زانستی حکومەتی هەرێمی کوردستان، بڕیارێکی گرنگی لە بەرژەوەندی قوتابیانی چەمچەماڵ و دەوروبەری دەرکرد.

ڕاگەیێنراوی فەرمی: ئێوارەی 13-12-2025، وەزارەتی خوێندنی باڵا و توێژینەوەی زانستی حکومەتی هەرێمی کوردستان ڕایگەیاند: د.ئارام محەممەد وەزیری خوێندنی باڵا و توێژینەوەی زانستی، بڕیاری لێخۆشبوونی لە کرێی خوێندنی قوتابیانی دانیشتووی قەزای چەمچەماڵ و دەوروبەری دەرکرد.

بەگوێرەی ڕاگەیێنراوەکە، بڕیارەکە ئەو قوتابیانە دەگرێتەوە، کە بە پارالێڵ یان خوێندنی ئێواران لە خوێندنی بەرایی (دیبلۆم و بەکالۆریۆس) و خوێندنی باڵا (دیبلۆمی باڵا، ماستەر، دکتۆرا) لە سەرجەم زانکۆکان وەرگیراون، بۆ بڕی ماوەی کرێی خوێندنیان بۆ ساڵی خوێندنی 2025-2026. 

زانیاریی زیاتر: قوتابی پێویستە بە دۆکیۆمێنتی یاسایی بیسەلمێنن کە دانیشتووی قەزای چەمچەماڵ، یان ئەو شوێنانەن کە زیانیان بەرکەوتووە، بۆ ئەوەی بڕیاری لێخۆشبوون لە کرێی خوێندن بیانگرێتەوە.