دووەم کاروانی هاوکارییەکانی هەڵمەتی ئاڤا بەرەو چەمچەماڵ بەڕێکەوت

ئاڤا نیوز

دووەم کاروانی هاوکارییەکانی هەڵمەتی ئاڤا میدیا بەرەو شاری چەمچەماڵ بەڕێکەوت و بڕیارە کاروانی دیکەش ئامادە بکرێت و بنێردرێن. 

چیرۆکی سەرەکی: ماوەی دوو ڕۆژە ئاڤا میدیا هەڵمەتێکی فراوانی بۆ کۆکردنەوەی هاوکاری بۆ لێقەوماوانی سنووری قەزای چەمچەماڵ، ناحیەکانی شۆڕش و تەکیە دەستپێکردووە، لەو چوارچێوەیەدا زیاتر لە یەک ملیار دینار و 15 بارهەڵگر پێداویستی سەرەتای کۆکراوەتەوە. 

زانیاریی زیاتر: شەوی شەممە دووەم کاروانی هاوکارییەکانی هەڵمەتی ئاڤا میدیا بەرەو شاری چەمچەماڵ بەڕێکەوت، کە پێکهاتووە لە ئامێری گەرمکەرەوە و زۆپا و بەتانی، بڕیاریشە لە چەند کاتژمێری داهاتوودا بگەتە دەست هاونیشتمانییانی خۆشەویستی شاری چەمچەماڵ. 

لەلایەکی دیکەوە: هەر ئەمشەو چەند بارهەڵگرێکی دیکەی هاوکاریی ئامادە دەکرێن بۆ ئەوەی بە زووترین کات بگاتە دەست لێقەوماوانی سنووری چەمچەماڵ، تەکیە و شۆڕش. 

ئەوەی پێویستە بیزانیت: ئەمشەو دواکاتە بۆ گەیاندنی هاوکارییەکان بە ئۆفیسی سەرەکی ئاڤا میدیا لەشاری هەولێر، لە دوای کاتژمێر 12ـی شەوەوە، هەڵمەتی کۆکردنەوەی پێداویستیی ناوماڵ کۆتایی دێت و تەنها کۆکردنەوەی پارە لە ڕێگەی FIB بەردەوام دەبێت.