گەورەترین چێشتخانەی گەڕۆک لەڕێگەی تیمی ئاڤاوە بەرەو سنووری چەمچەماڵ بەڕێدەکەوێت

ئاڤا نیوز

گەورەترین چێشتخانەی گەڕۆکی هەولێر بەمەبەستی گەیاندنی هاوکاریی بە هاووڵاتییانی چەمچەماڵ و دەورووبەری هاتووە بۆ ئۆفیسی سەرەکی ئاڤا میدیا، بڕیارە کەمێکی دیکە لەگەڵ کاروانێکی دیکەی هاوکارییەکان بەرەو ناوچە زیانلێکەوتووەکان بەڕێبکەوێت.  

چیرۆکی سەرەکی: لەماوەی دوو ڕۆژی هەڵمەتی کۆکردنەوەی هاوکاری بۆ زیانلێکەوتووانی سنووری چەمچەماڵ، تەکیە و شۆڕش، هاووڵاتییانی هەولێر چەندین تۆن پێداویستی ناوماڵ و خواردنیان بۆ زیانلێکەوتووانی ئەو سنوورە هێناوەتە ئۆفیسی سەرەکی ئاڤا میدیا و دەستکراوە بە گواستنەوەیان. 

زانیاریی پەیامنێر: هیشام سەعید، پەیامنێری ئاڤا ڕایگەیاند: خواردنگەی uk pizza لە هەولێر بارهەڵگرێکی جیاوازی هێناوە بۆ ئۆفیسی سەرەکی ئاڤا میدیا کە خواردنگەیەکی سەفرییە و خواردن بۆ هاووڵاتییانی زیانلێکەوتوو دابین دەکات.

لێدوانی فەرمی: سەنار کەریم خاوەنی چێشتخانەکە بە ئاڤا میدیای ڕایگەیاند: دەمانەوێت هاوشان لەگەڵ گەیاندنی هاوکارییەکانی ئاڤا میدیا، خواردن بگەیەنین بەو هاووڵاتییانی تووشی زیانبوون و ئێستا ناتوانن لەماڵەوە خواردن ئامادە بکەن. 

- لەتواناماندایە ڕۆژانە بەبەهای 15 بۆ 20 ملیۆن دینار  خواردن بەسەر هاووڵاتییان دابەش بکەین، چەند ڕۆژێکیش بەردەوام دەبین.

زانیاریی زیاتر: ئەو چێشتخانە گەڕۆکە هاوکات لەگەڵ دروستکردنی خواردن، لە ڕێگەی دلیڤەریشەوە خواردن بۆ ئەو ماڵانە دابین دەکات کە دوورن و ناتوانن بە ئاسانی خواردن وەربگرن.