ئێران ھێرشی مووشەکی دەکاتە سەر ئیسرائیل

ئاڤا نیوز

 

ئاژانسی بلۆمبێرگی ئەمریکی ئاشکرای کردووە، ئێران ئامادەکاری دەکات بۆ ئەوەی لە چەند رۆژی داھاتوودا، ھێرشی مووشەکی دژی ئیسرائیل دەست پێ بکات.

 

چی ڕوویدا؟ لە چەند ڕۆژی ڕابردوو، فڕۆکەکانی ئیسرائیل باڵەخانەی کونسوڵخانەی ئێرانیان لە دیمەشق کردە ئامانج، بەهۆیەوە دوو فەرماندەی سوپای پاسداران گیان لەدەستدا؛ دوای ڕووداوەکە بەرپرسانی باڵای ئێران جەختیان لەوە کردەوە وەڵامیان دەبێت.

 

زانیاریی فەرمی: بلومبێرگ بە پشت بەستن بە زانیاری ھەواڵگری ئاماژەی بەوەداوە، ئەمریکا و ھاوپەیمانەکانی پێیانوایە وەڵامدانەوەی ئێران بۆ ھێرشی سەر ئیسرائیل نزیکە و هێرشەکە لەڕێگەی مووشەکی بالیستی یان فڕۆکەی بێفڕۆکەوانەوە دەکرێت.

 

لەلایەكی دیكەوە: مارکۆ‌ ڕۆبیۆ، سیناتۆری كۆمارییەكان لە ئەمریكا لە تۆڕی كۆمەڵایەتی ئێكس نووسیویەتی: ئێران دەیەوێت لە نێو خاكی خۆیەوە، هێرشێكی بەرفراوان بكاتە سەر ئیسرائیل، ئیسرائیلیش بە خێرایی وەڵامێكی تووندی ئەو هێرشانەی ئێران دەداتەوە.

ئەوەی ئێستا ڕوودەدات: ئەو سیناتۆرە پێی وایە " ئەوەی دواتر ڕوو دەدات، مەترسیدارترین چركەساتی ڕۆژهەڵاتی نێوەڕاستە لە دوای ساڵی 1973 (مەبەستی شەڕی یەوم كیپورە)ـەوە.

 

ئەوەی لەوبارەیەوە دەگوترێت: لە میدیاکانی ئەمریکا وابڵاوبووەتەوە کە بەمزووانە مایکل کواریلا، فەرماندەی سێنتکۆم بەمەبەستی هەماهەنگی بۆ ئامادەکاری وەڵامدانەوەی هێرشی چاوەڕوانکراوی ئێران بۆ سەر ئیسرائیل، سەردانی تەلئەبیب بکات.