عەدنان موفتی: بەشدارینەکردنی پارتی زیان بە پرۆسەی سیاسی و هەڵبژاردن دەگەیێنێت

ئاڤا نیوز

 

سەرۆکی پێشووتری پەرلەمانی کوردستان پێیوایە، بەشدارینەکردنی پارتی لە هەڵبژاردن، زیان بە پرۆسەی سیاسیی عێراق دەگەیێنێت و جەخت لەوەش دەکاتەوە، بۆ تەواوکردنی پرۆسەکە باشترە پارتی بەشداری بکات.

 

بۆچی گرنگە؟ ناڕەزایەتیی پارتی لە پڕۆسەی هەڵبژاردنی پەرلەمانی كوردستان، بەرپرسانی باڵای عێراقی ‌هێناوەتە سەر خەت و لە هەوڵی ئەوەدان بەشێک لە داواکارییەکانی پارتی لەبارەی شێوازی بەڕێوەچوونی هەڵبژاردن جێبەجێ بکەن.

 

لێدوانی فەرمی: "ئومێد دەکەم و پێم باشە پارتی بەشداری لەو هەڵبژاردنە بکات، چونکە پرۆسەکە کامل دەبێت. ئەگەر بەشداری نەکات ڕاستیەکەی چۆن مامەڵە دەکرێت لە دوای ئەو بەشداری نەکردنە، بەر چاوم زۆر ڕوون نییە، بەڵام زیان بە پرۆسەی سیاسی دەگەیێنێت". عەدنان موفتی ئەوەی بە ئاڤا نیوز ڕاگەیاند.

 

ئەوەی پێویستە بیزانیت: ڕۆژی 07-04-2024 شاندێکی پارتی لە کۆبوونەوەیان لەگەڵ یونامی، ئامادەیی حیزبەکەیان بۆ هەڵبژاردنی پەرلەمانی کوردستان دووپات کردەوە، بەڵام بەو مەرجەی هەڵبژاردنەکە دوور بێت لە دیزاینی پێشوەختە.