ڕوونكردنەوەی وەزارەتی دارایی لەبارەی وردبینیی لیستی مووچەخۆران

ئاڤا دیجیتاڵ

 

وەزارەتی دارایی هەرێمی کوردستان ڕوونكردنەوەیەکی لەبارەی وردبینی لە لیستی فەرمانبەران و مووچەخۆرانی هەرێمی کوردستان بڵاوکردووتەوە و دەڵێت: "هیچ شتێكی نایاسایی تێدا نەبووە".

 

‎لێدوانی فەرمی: لەماوەی ڕابردوو تیمی هاوبەشی دیوانی چاودێری دارایی حكومەتی فیدراڵ و هەرێمی كوردستان ماوەی مانگێك لەهەرێمی كوردستان سەرقاڵی وردبینی بوون لە ژمارەی فەرمانبەران و مووچەخۆرانی هەرێمی كوردستان و بەمەیدانی سەردانی سەرجەم وەزارەت و دامەزراوەكانییان كردووە.

 

لەلای ئێمەوە هیچ شتێكی نامۆ و نایاسایی لەنێو لیستی فەرمانبەران و مووچەخۆرانی هەرێمی کوردستاندا نییە، بەڵام ناوە ناوە ئەم بابەتە دەوروژێنرێت و ئەمەش بە جۆرێك لە گێچەڵ دەزانین بۆ تەگەرەخستنە بەردەم پێدانی مووچە كە مافی ڕەوا و سادەی خەڵكە.

 

‎ئەوەی پێویستە بیزانیت: وەزارەتی دارایی هەرێمی کوردستان دەڵێت: "ئەوەی پێویست بێت و لە چوارچێوەی داواكارییە یاساییەكانی وەزارەتی دارایی حكومەتی عێراق بێت، بە نووسراوی فەرمی وەڵامییان دەدەینەوە و هیچ تێبینییەكیش بەجێناهێڵین".