هەڵمەتەکەی ئاڤا میدیا ماڵی خێزانە نەدار و لێقەوماوەکەی ناحیەی شۆڕش ئاوەدان دەکاتەوە

ئاڤا نیوز

 

لە پەخشی ڕاستەوخۆ، سوورەیا هەساریی، پێشکەشکاری ئاڤا میدیا، قسە لەگەڵ ئیسماعیل و سکاڵا دەکات کە بەهۆی لافاوەکەی 9-12-2025 هەموو ماڵەکەیان وێران بوو، مژدەیەکیان دەداتێ بۆ پێ بەخشینی کلیلی خانوویەکی نوێ بە خۆیان و دابینکردنی سەرجەم پێداویستییە سەرکییەکان بۆ ماڵەکەیان و دەستپێکردنی ژیانێکی نوێ.

چیرۆکی سەرەکی:  ژن و مێردێکی هەژاری دانیشتووی ناحیەی شۆڕش لە چەمچەماڵ، ماوەیەکە پڕۆسەی هاوسەرگیرییان پێکێهێناوە و لە خانووی کرێدان بەهۆی لافاوەکەوە زیانی زۆریان پێ گەیشت و داوایان لە ئاڤا و خێرخوازان دەکرد بەهانایانەوە بچین.

 

گۆشەیەكی دیكەی چیرۆکەکە: ئەو گەنجە لەگەڵ هاوژینەکەی گوزەرانییان لەسەر کۆکردنەوەی پاشماوە پلاستکییەکان بوو، گەنجەکە هەر بە فرۆشتنی دەبە و پلاستیک پارەی هاوسەرگیرییەکەی کۆکردبووەوە و ئەو ماڵە خنجیلانەی پێکهێنابوو، بەڵام ئەوەشی لەدەستدا بەهۆی لافاوەکەوە.

 

چارەسەر: دیار محەممەد، پەیامنێری ئاڤا میدیا، لەکاتی پێدانی مژدەی پێبەخشینی کلیلی خانووی نوێ بەو خێزانە هەژارە، وتی، ئیتر تەواو هەر ئەمشەو لەم خانووەدا دەبن، سبەی کلیلی خانووی نوێ وەردەگرن لەلایەن ئاڤا و ژیانێکی نوێ و جۆرێکی نوێی کاسپی دەست پێ بکەن، چونکە ماتۆڕی سێ تایە بۆ خاوەن ماڵەکەش دابین کراوە.

لەلایەکی دیکەوە: خوشکی ژنەکە یەکەم شەوی لافاوەکە بۆ ئاڤا وتی، لەوەتەی ماڵەکەیان بە لافاو وێران بووە سەد کەناڵ و پەیج هاتووە بۆ لایان و وەعدیان پێداون کەچی تا ئێستا کەس هاوکاریی نەکردوون. 

باکگراوند: یەکێک لەو شوێنانەی بەهۆی لافاوەکەی 9-12-2025 زیانی زۆری بەرکەوت ناحیەی شۆڕشی سەر بە قەزای چەمچەماڵ بوو، لە ماوەیەکی کەم ئاو و  قوڕ و لیتە چووە ناو دەیان ماڵ، هەر لە دەستپێکی ڕووداوەکە ئاڤا میدیا پیشەییانە ڕووماڵی ڕووداوەکەی کردووە لە خەمی خەڵکدا بووە و خەڵکیش لە هەولێر و دهۆک و ئاکرێ و چەندین ناوچەی دیکە کۆمەک و هاوکارییەکانیان هێنا بۆ کامپینەکەی ئاڤا میدیا بۆ ئەوەی فریای خێزانە نەدار و هەژارەکان بکەون.