هەولێر چاوەڕوانی هاتنی گەشتیارە

ئاڤا نیوز

هەولێر ئامادەکاریی دەکات بۆ پێشوازی لەهاتنی زۆرترین ژمارەی گەشتیار، بۆ ئەو مەبەستەش ئامادەکاریی دەستپێکردووە، پلان و بەرنامەی تۆکمەش بۆ ئەو مەبەستە ئامادە کراوە. 

وێنە گەورەکە: ئەمڕۆ دووشەممە، 15-12-2025، ئومێد خۆشناو، پارێزگاری هەولێر سەبارەت بە ڕێورەسمى كریسمس و پێشوازیکردن لە ساڵی نوێ، لەگەڵ قائیمقامى ناوەندیی هەولێر، بەڕێوەبەرانی گشتیى گەشتوگوزار، تەندروستى، سەرۆكی شارەوانی و بەڕێوەبەرانی پۆلیس، هاتووچۆ، بەرگریی شارستانی، جێگری بەڕێوەبەری ئاسایش و بەرپرسانی دیكەی هێزەکانى ناوخۆ کۆبووەوە.

لێدوانی فەرمی: ئومێد خۆشناو بە ئاڤا میدیای ڕاگەیاند، لەپێناوی پاراستنی ماڵی هاونیشتمانییان و گەشتیاران و ڕێگەگرتن لەهەر ڕووداوێکى نەخوازراو و نایاسایی و گرتنەبەری ڕێوشوێنی ئەمنیی پێویست، ئەرک بەسەر تەواوى هێزە ئەمنییەكان دابەشکرا.

- لایەنە پەیوەندیدارەکان ڕاسپێردراون، بەپێى ڕێنمایی و یاسا بەرکارەکان کاری پێویست ئەنجام بدەن بۆ نەهێشتنی دیاردەى سواڵکردن.

زانیاریی زیاتر: ساڵانە هەولێر هاوشێوەی پایتەختە پێشکەوتووەکانی جیهان، لە ڕێگەی کەرتی تایبەتەوە چەندین چالاکی جۆراوجۆر بەڕێوە دەبات، بۆ ئەو مەبەستەش چەندین شوێنی دیاری شارەکە بۆ ئەو مەبەستە ئامادە دەکرێن.