پارتی و یەکێتی لەسەر پێکهێنانی حکومەت کۆدەبنەوە

ئاڤا نیوز

بۆ پێکهێنانی کابینەی دەیەمی حکومەتی کوردستان، پارتی و یەکێتی کۆبوونەوەکانیان دەستپێدەکەنەوە، لە ڕابردوو لەسەر زۆربەی وردەکارییەکانی کابینەکە ڕێککەوتوون، تەنیا دابەشکردنی پۆستەکان ماوە لەسەری ڕێکبکەون.

چیرۆکی سەرەکی: پێشنیوەڕۆی ئەمڕۆ سێشەممە، لەبارەگای مەکتەبی سیاسیی پارتی لە پیرمام، شاندی پارتی و یەکێتی کۆبوونەوەکانیان بۆ پێکهێنانی کابیەنی 10ـی حکومەتی کوردستان دەستپێدەکەنەوە.

زانیاریی پەیامنێر: هیشام سەعید، پەیامنێری ئاڤا گوتی، "کۆبوونەوەکە کاتژمێر 11ـی پێشنیوەڕۆ دەست پێدەکات، شاندی یەكێتی پێکهاتوونە لە قوباد تاڵەبانی، دەرباز کۆسرەت، شاڵاو شێخ سەڵاح و ڕێواز فایەق، شاندی پارتی لە هۆشیار زێباری، دڵشاد شەهاب، پشتیوان سادق لەخۆدەگرێت، ئەگەری بەشداریکردنی ئامانج ڕەحیم لە شاندی یەکێتی و ئومێد سەباح لە پارتی هەیە."

لەلایەکی دیکەوە: چەند ڕۆژ پێش ئێستا مەحموود محەممەد، گوتەبێژی پارتی دیموكراتی كوردستان ڕایگەیاند، لەم دۆخەی ئێستا پێمان باشە پۆستی وەزارەتی ناوخۆ هەر لای پارتی بمێنێتەوە، گوتیشی: لە كۆبوونەوە نافەرمییەکەی هەفتەی ڕابردووی شاندی پارتی و یەكێتی بڕیاریاندابوو كە چەند ڕۆژێك بوار بەیەك بدەن و هەندێك كار هەیە بیكەن ئینجا كۆببنەوە.

- گوتەبێژی پارتی دیموكراتی كوردستان ڕاشیگەیاند: شاندی پارتی بە سەرۆكایەتیی هۆشیار زێباری بۆ پێكهێنانی كابینەی دەیەم بەردەوامە لە كارەكانی خۆی، دوای پەسەندكردنی ئەنجامی هەڵبژاردنەكانی عێراقیش لەلایەن دادگەی فیدراڵییەوە شاندی پێكهێنانی حكومەتی عێراقیشمان دەستبەكار دەبێت.