بەهۆی نالەباری کەشوهەواوە فێستیڤاڵی پەتاتە لە دهۆک ڕادەگرێت

ئاڤا نیوز

ماوەی دوو ڕۆژە کەشوهەوایەکی ناجێگیر ڕوو لە هەرێمی کوردستان کردووە، بەهۆیەوە کاریگەری لەسەر چەند چالاکییەک دروست کردووە، بەهۆیەوە بۆماوەی ڕۆژێک فێستیڤاڵی پەتاتەی دهۆک ڕادەگیرێت. 

وێنە گەورەکە: پارێزگای دهۆک، لە بەرووبوومی پەتاتە یەکەم پارێزگایە لەسەر ئاستی عێراق، هەوڵەکانیش بۆ پاڵپشتی حکومەتی هەرێمی کوردستان بۆ جووتیاران لە چاندن و زیادکردنی بەرووبوومی پەتاتە و بە بازاڕکردنی بەردەوامە، هەر ئەمەش وایکردووە ساڵانە بڕی بەرووبوومی پەتاتە لەو پارێزگایە زیاتر ببێت.

لێدوانی فەرمی: د. روفائيل شليمون توما، سەرۆکی لیژنەی ئامادەکاریی فێستیڤاڵی پەتاتە، بە ئاڤا میدیای گوت: بەهۆی ناسەقامگیری کەشوهەوا لە دهۆک بڕیاماندا تەنیا ئەمڕۆ فێستیڤاڵی پەتاتە ڕابگرین و سبەی کاتژمێر 11ـی سەرلەبەیانی دەستپێدەکاتەوە تا کاتژمێر 6-ی ئێوارە بەردەوام دەبێت.

باکگراوند: بەرووبوومی ئەمساڵی پەتاتە لە سنووری پارێزگای دهۆک، 588 هەزار تۆن بووە، لە ماوەی 11 مانگی یەکەمی ئەمساڵیش 197 هەزار و 817 هەزار تۆن لە دهۆکەوە ڕەوانەی باشوور و ناوەڕستی عێراق کراوە.

بەتەنیشت ئەم بابەتەوە: بەشی پێشبینی لە بەڕێوەبەرایەتیى گشتیى کەشناسی و بوومەلەرزەزانی هەرێمی کوردستان بڵاوی کردووەتەوە، کەشوهەوای پارێزگای دهۆک لە ئەمڕۆدا ناوچە شاخاوییەکانی بەردەوام هەور دەبێت لەگەڵ نمەبارانی کەم و بارینی بەفر لە سەر ناوچە شاخاوییە بەرزەکان، بۆ سبەینێش ئاسمان نیمچە هەور دەبێت، لە کاتەکانی بەیانی زوو ئەگەری دروستبوونی تەم هەیە لە ناوچە شاخاوییەکان، لەسەنتەری پارێزگاکان ئاسمان نیمچە هەور دەبێت بەگشتی، لە بەرە بەیانی زوو ئەگەری بەفرێکی کەم لە سەر ناوچە شاخاویە سنوورییەکان هەیە