ئاڤا دەخیلەی منداڵە بەخشندەکانی پێشکەشی قوتابییانی قوتابخانەی قەندیل کرد

ئاڤا نیوز

 

ئاڤا میدیا بڕیاریدا ئەو دەخیلانەی لە هەڵمەتی میدیایی ئاڤا کۆکرابوونەوە، دابەش بکرێن بەسەر ئەو قوتابیانەی لە قوتابخانەی قەندیل زیانیان پێگەیشتبوو، ئەوەش وەکو پشتیوانییەک بۆ پرۆسەی پەروەردە و فێرکردن و نیشاندانی هاوسۆزیی منداڵانی کوردستان بۆ یەکتریی بە بێ جیاوازیی.

 

چیرۆکی سەرەکی: ڕۆژان ئەبوبەکر، پێشکەشکاری ئاڤا میدیا، ئاشکرایکرد دەخیلەی ئەو منداڵانەی لە هەولێر و دهۆک و ناوچەکانی دیکە بەخشراونەتە هەڵمەتەکەی ئاڤا، پێشکەشی قوتابیانی زیان پێگەیشتووی قوتابخانەی قەندیل دەکرێن، هەر بۆیە چۆمان مەحمود، دەخیلەکانی پێشکەشی قوتابییەکان کرد کە لە ئێستادا ڕێکخراوی کوردستان فاوندەیشن قوتابخانەکەیان بۆ نۆژەن دەکاتەوە.

 

چۆمان لە حەوشەی قوتابخانەی قەندیل و لە نزیک کورسی-ڕەحلە زیان پێگەیشتووەکان دەخیلەکانی بەسەردا دابەشکردن و منداڵەکان خۆشحاڵی خۆیان دەردەبڕیی.

 

گۆشەیەكی دیكەی چیرۆکەکە:  لافاوەکەی چەمچەماڵ، ئەوەی دەرخست خێزانەکان لە کوردستان هێندە پەروەردەیەکی جوانی منداڵەکانیان کردووە کە سەرجەم ئەو سنوورە حیزبی و کۆمەڵایەتی و نەتەوایەتییانەیان تێکشکاند کە هۆکاربوون بۆ لێکدابڕانی خەڵکی کوردستان، منداڵێک لە ئاکرێ و تەیراوا و زاخۆ و سەیدسادق و هەڵەبجە و دهۆک... بووک و دەخیلە و جانتای پڕ دەفتەر و قەڵەم بهێنن بۆ منداڵە لێقەوماوەکان.

 

لەلایەکی دیکەوە: منداڵەکان، وانەیەکی جوانیان فێری گەورەکان و هەموومان کرد، ئەوان خۆشەویسترین پارچە یادەوەریی و شتومەکی خۆیان بەخشییە کامپینی ئاڤا میدیا و شوێنەکانی دیکە، بۆئەوەی کۆمەکی ئەو منداڵانەی پێ بکەن کە بەهۆی لافاوەکەوە زیانیان بەرکەوتووە، چونکە جارێکی دیکە سەخت بوو دایک و باوکیان جانتا و پۆشاک و ڕاخەر و گەرمکەرەوەیان بۆ بکڕن لەکاتێکدا هەموو ماڵەکەیان لافاو بردبووی و لەناوچووبوو.

 

ئەوەی بینرا: لە پەخشی ڕاستەوخۆی ئاڤا هەمووان بینییان زۆربوون ئەو خێزانانەی بە ئۆتۆمبێلەکانیان دەهاتن بۆ ئاڤا و منداڵەکانیان هاندەری هاتن و بەخشینەکان بوون، زۆریش بوون ئەو منداڵانەی لە چەمچەماڵ و تەکێ و شۆڕش لە پەیامنێرەکانی ئاڤا میدیا کۆدەبوونەوە و دڵنیابوون شاشەی ئاڤا دەنگ و ڕەنگ و دۆخی ژیانیان دەگەیەنێت و کۆمەک دەکرێن.

 

باکگراوند: بەهۆی لافاوەکەی 9-12-2025 لە چەمچەماڵ، تەکێ و شۆڕش زیانی گیانی و ماددی زۆری بەدواوە بوو، چەندین فەرمانگەی حکومیی لافاو زیانی گەورەی پێ گەیاند.