ئاشکراکردنی شوێنی قاچاغ بۆ دروستکردنی ددان لە هەولێر

ئاڤا نیوز

 

لە هەولێر تاقیگەیەکی نا یاسایی و بێ مۆڵەت دەستی بەسەردا گیرا، کە ددانی بۆ نۆڕینگە و نەخۆشخانەکانی ددان دروستکردووە بەشێوەیەکی دوور لە ڕێنماییە تەندروستییەکان و بەبێ ئەوەی چاودێریی لەسەر بێت.

 

چیرۆکی سەرەکی: دوو برا، خەڵکی سووریان و لە هەولێر نیشتەجێ بوون، هەر لەو شوقەیەی بەکرێیان گرتووە و نزیک شوێنی خەوتن و مامەڵەی ڕۆژانەیان، چەند ئامێرێکیان داناوە و خەریکی دروستکردنی ددان بوون بۆ ژمارەیەک پزیشکی ددان لە هەولێر.

 

زانیاریی زیاتر:  عوبێد هەرکی، پەیامنێری ئاڤا میدیا، لەگەڵ تیمە هاوبەشەکانی قائیمقامیەتی پارێزگای هەولێر و تیمی چاودێریی تەندروستی چووەتە شوێنەکە، دەرکەوتووە ئەم دوو کەسە هەموو جۆرە ددانەکانیان دروستکردووە، وەکو: تاقم، هۆڵیود سمایڵ، سیرامیک و ئی ماکس و سەرجەم جۆرەکانی دیکە، بەبێ ئەوەی ڕەچاوی کواڵیتی باش و ڕێنماییە کارپێکراوەکان بکەن.

 

ئەوەی پێویستە بیزانیت: ئەو دوو کەسە کە دەستگیرکراون، دەرکەوتووە هیچ پسپۆڕییەک و بڕوانامەیەکی یاسایی و زانستییان لەو بوارەدا نەبووە، یەکێک لە کەسە دەستگیرکراوەکان بە لیژنەکەی وتووە، "پێشتر لە سووریا خوێندکاری کۆلێژی ددان بووە" بەبێ ئەوەی بڕوانامەکەی بەدەستهێنابێت.

 

چاوەڕوانکراوەکان: بەپێی بەدواداچوونەکانی ئاڤا، هێشتا ئاشکرا نەبووە چەند پزیشک و نۆڕینگە و نەخۆشخانەی ددان لە هەولێر مامەڵەیان لەگەڵ ئەم دوو کەسەدا کردووە بە مەبەستی دروستکردنی ددانی هەرزان و بێ کواڵیتی.

 

لێدوانی فەرمیی: نەبەز عەبدولحەمید، قائیمقامی هەولێر، بە ئاڤا میدیای ڕاگەیاندووە، دوو کەسە دەستگیرکراوەکە دەگەیەنم بە دادگا و لێپێچینەوەش لەگەڵ ئەو پزیشکانە دەکەین کە مامەڵەیان لەگەڵ کردوون و بە سزایان دەگەیەنین.