فیفا ستایشی هاندەرانی زاخۆ دەکات: "شارێکی بچووک بەڵام هاندەرانیان خاوەن دڵێکی گەورەن"

هەواڵ
16 کانوونی یەکەم

شەیری بکە لە:

فیفا ستایشی هاندەرانی زاخۆ دەکات: "شارێکی بچووک بەڵام هاندەرانیان خاوەن دڵێکی گەورەن"

گرافیک ئاڤا نیوز

ئاڤا نیوز

یەکێتیی تۆپی پێی جیهان دوای بردنەوەی خەڵاتی باشترین هاندەر بۆ ساڵی 2025 ستایشی هاندەرانی یانەی زاخۆ دەکات و دەڵێت، " یانەی زاخۆ مێژووییە، زاخۆ شارێکی بچووکە بەڵام هاندەرانی خاوەن دڵێکی گەورەن".

چیرۆکی سەرەکی: ئەمڕۆ سێشەممە یەکێتیی تۆپی پێی جیهان 'فیفا' ڕایگەیاند یانەی زاخۆ بووەتە براوەی خەڵاتی باشترین هاندەر لە ئاستی جیهان بۆ ساڵی 2025.

ڕاگەیێنراوی فەرمی: فیفا لە ماڵپەڕ و ئەکاونتە فەرمییەکانی خۆی، ستایشی یانەی زاخۆی کرد و ناوی کوردستانیشی هێناوە و دەڵێت: "یانەی زاخۆ لە هەرێمی کوردستان لە عێراق مێژووییە، زاخۆ شارێکی بچووکە بەڵام هاندەرانی خاوەن دڵێکی گەورەن".

زانیاریی زیاتر: ئێستا فیفا ئاهەنگێکی گەورە لە دەوحەی پایتەختی قەتەر ڕێکدەخات و باشترین یاریزان، باشترین گۆڵکار، باشترین یانە و باشترین هاندەر دەستنیشان دەکرێت و بەفەرمیی خەڵاتی "زە بێست" بە یانەی زاخۆ دەدات، بە گوێرەی پێشبینییەکان زاخۆ زیاتر لە هەشت ملیۆن دەنگی بەدەست هێناوە.

ئەمەش بزانە: سەرکردەکانی کوردستان و عێراق و بەرپرسانی باڵای حیزبەکان پەیامی پیرۆزباییان بۆ یانەی زاخۆ نارد، لەناویاندا سەرۆک مەسعود بارزانی و مەسرور بارزانی، سەرۆکوەزیرانی کوردستان.

یانەی زاخۆ سوپاسی هەموو ئەو کەسانە دەکات کە دەنگیان پێداون یان پاڵپشتیان کردوون، لەناویاندا سوپاسی ئاڤا میدیا دەکات.

باکگراوند: ئاڤا میدیا وەک ئەرکێکی نیشتمانی و نەتەوەیی، کەمپەینی سەرخستنی یانەی زاخۆی بۆ بردنەوەی خەڵاتی "زە بێست" بۆ باشترین هاندەر لە جیهان ڕاگەیاند. ئاڤا لە شار و شارۆچکەکانی کوردستان چالاکی جۆراوجۆری ئەنجامدا، سەدان هاونیشتمانی لەڕێگەی ئاڤاوە دەنگیان بە یانەی سوورپۆشەکە دا.