پارێزگارى بانکى ناوەندی: لە کۆنترۆڵ کردن و کەم کردنەوەی هەڵاوسان سەرکەوتوو بووین

ئاڤا نیوز

 

پارێزگاری بانکی ناوەندیی عێراق دەڵێت، سەرەڕای ئاستەنگییەکانی بەردەمیان، بەڵام لە بەرزکردنەوەی یەدەگی دراوی بیانی لە بانکی ناوەندی و کۆنتڕۆڵ کردن و کەم کردنەوەی هەڵاوسان سەرکەوتوو بوون.

 

ئەوەی پێویستە بیزانیت: ڕۆژی سێشەممە سەرۆکوەزیرانی عێراق ئاشکرای کرد کە ئێستا یەدەگی بانکی ناوەندی بۆ 108 ملیار دۆلار بەرزبووەتەوە، هەڵاوسانیش لە 7.2%ەوە بۆ 2.7% دابەزیوە.

 

لێدوانی فەرمی: عەلی عەلاق، پارێزگاری بانکی ناوەندیی عێراق لە قاهیرەی پایتەختی میسر بەشداری لە کۆنگرەیەکی هەرێمی تایبەت بە ئابووریی ئیسلامی کرد و  وتى: عێراق پێویستی بە فرەجۆرکردنی ئابوورییەکەی و زیادکردنی داهاتەکانی هەیە، چونکە تەنیا پشتبەستن بە نەوت بەڕێژەی 90% دەبێتە هۆی نادڵنیایی لە داهات و جێگیری دارایی.

ئەو دەڵێت: بەهۆی ئەوەی عێراق وڵاتێکى هاوردەکارە نەک هەناردەکار، بۆیە ڕۆژانە خواستی زۆر لەسەر دراوی بیانی هەیە.

 

زانیاریی زیاتر: لەبارەی یەدەگی بانکی ناوەندیش پارێزگارى بانکى ناوەندى وتى: "جێگیریی نرخی دراو ئامانجی سەرەکیمانە و بەهۆی سەرکەوتنمان لە بەرزکردنەوەی یەدەگی بانکی ناوەندیش لەگەڵ چەند سیاسەتێکی دیکەى دراو، وای کردووە هەڵاوسان لە عێراق بۆ ئاستێکی پێوانەیی دابەزێت.