مەسرور بارزانی لە ڕۆژی ئاڵای کوردستان: لەژێر سایەی ئەم ئاڵا پیرۆزە دەست لەناو دەستی یەكتر هەنگاو دەنێین

ئاڤا نیوز

 

لە قەڵای هەولێر بە ئامادەبوونی سەرۆکوەزیران مەسرور بارزانی  ڕۆژی ئاڵای کوردستان بەرز ڕاگیرا، سەرۆکوەزیران ڕایگەیاند، "لەژێر سایەی ئەم ئاڵا پیرۆزە بەرەو كوردستانێكی ئاوەدان و سەقامگیر دەست لەناو دەستی یەكتر هەنگاو دەنێین.

 

چیرۆکی سەرەکی: ئەمڕۆ چوارشەممە 17-12-2025، بە ئامادەبوونی سەرۆکوەزیرانی کوردستان، لە قەڵای هەولێر، ڕێورەسمێکی تایبەت بۆ بەرزڕاگرتنی ڕۆژی ئاڵای کوردستان بەڕێوەچوو، ژمارەیەک لە نوێنەران و کەسایەتیی پێکهاتە ئایینی و نەتەوەییەکانی هەرێمی کوردستان لە ڕێوڕەسمەکە بەشدار بوون.

 

ڕاگەیێنراوی فەرمی: مەسرور بارزانی سەرۆکوەزیرانی کوردستان لە ڕێوڕەسمی بەرزڕاگرتنی ئاڵای کوردستان، لە گوتەیەکدا ئاماژەی بەوە کرد "ئاڵای کوردستان، هێمای خۆڕاگری و قوربانیدانی بێوچانی گەلەكەمانە، هێمای وزە و هێز و ئاشتی و ئاوەدانی و پێكەوەژیانە.

 

-ئاڵای کوردستان بە درێژایی مێژوو و هەر لە دروستبوونیەوە تاوەكو ئێستا، چەندینجار بووەتە دوا بەرگی جەستەی گیانی هەزاران شەهید لە كوردستاندا، لەپێناو بەرزڕاگرتنی ئەم ئاڵایە، هەزاران تێكۆشەر لە زیندانەکان گیانیان سپاردووە یان بەرەو پەتی سێدارە ڕۆیشتوون، یان لە لوتكەی چیاكان و پانتایی دەشتەكان گیانیان سپاردووە. بۆیە ئەركی هەموومانە ئەو ئاڵایە بەرز رابگرین.

 

-ئێستاش لەژێر سایەی ئەم ئاڵا پیرۆزە بەرەو كوردستانێكی ئاوەدان و ئارام و سەقامگیر، دەست لەناو دەستی یەكتر هەنگاو دەنێین، بۆیە بەرز و شەكاوە بێت ئاڵای پیرۆزی كوردستان.