هەرێمی كوردستان و سوید بۆ بەرەنگاربوونەوەی تاوانە ڕێكخراوەكان هەماهەنگی دەكەن

ئاڤا نیوز

شاندێکی باڵای وەزارەتی دادی سوید و دەزگای داواکاری گشتی ئەو وڵاتە سەردانی هەرێمی کوردستان دەکەن و لەگەڵ داواکاری گشتیی هەرێمی کوردستان تاوتوێی تاوانە ڕێکخراوەکانی وەک بازرگانیکردن بە مرۆڤ و ماددەی هۆشبەریان کرد.

چیرۆكی سەرەكی: ئەمڕۆ چوارشەممە، دادوەر محه‌ممه‌د غه‌فور، سەرۆکی داواکاری گشتيی هەرێمی کوردستان، پێشوازیی لە شاندێکی باڵای وەزارەتی دادی سوید و دەزگای داواکاری گشتيی ئەو وڵاتەی كرد.

زانیاریی بەدەستهاتوو: لە دیداری نێوان سەرۆكایەتیی داواكاری گشتیی هەرێمی كوردستان و شاندی دادوەریی وەزارەتی دادی سوید و دەزگای داواكاری گشتیی ئەو وڵاتە، باس لەو تاوانە ڕێكخراوانە كرا كە ڕەهەندێكی دادوەریی نێودەوڵەتییان هەیە و سنووری وڵاتان تێدەپەڕێنن، بەتایبەت تاوانی بازرگانیكردن بە مرۆڤ و ماددەی هۆشبەر.

لێدوانی فەرمی: دادوەر محەممەد غەفور، سەرۆكی داواكاری گشتیی هەرێمی كوردستان ڕایگەیاند، دامودەزگاكانی حكومەتی هەرێمی كوردستان، هەمیشە هاوكار و هەماهەنگن لە بەرەنگاربوونەوەی ئەو تاوانانەی كە ڕەهەندێكی نێودەوڵەتییان هەیە و سنوورەكان دەبەزێنن، بەتایبەت تاوانە ترسناكەكانی ڕێكخراوەیی پەیوەست بە باندەكانی بازرگانیكردن بە مرۆڤ و بازرگانیكردن بە ماددەی هۆشبەر، كە لەم ساڵانەی دواییدا بوونەتە هەڕەشە لەسەر ئاسایشی جیهان.

سەرۆکی داواکاری گشتيی هەرێمی کوردستان، جەختی لە هەماهەنگیی نێوان دامودەزگا دادوەرییەكانی هەرێمی كوردستان و وڵاتی سوید كردەوە، لە چوارچێوەی یاسا كارپێكراوەكان لەپێناو بەرەنگاربوونەوەی ئەو جۆرە تاوانانە و بنبڕكردنی مەترسییەكانی.

لەبەرامبەردا: شاندی دادوەریی سوید، ئاماژەیان بە زیادبوونی تاوانە ڕێكخراوەكان لە وڵاتەكەیان كرد بەتایبەت لەم ساڵانەی دواییدا، بە پێویستیان زانی بۆ بەرەنگاربوونەوەی ئەوجۆرە تاوانانە، هەرجۆرە ڕێکكارێكی پێویست بگرنەبەر، بۆ ئەمەش داوای هاوكاریی لە دەزگا دادوەرییەكانی هەرێمی كوردستان دەكەن.