ئاڤای خەڵک؛ خاوەن شووقەکانی پڕۆژەی ئالان تاوەر: 12 ساڵە لە چاوەڕوانی تەواوکردنی پرۆژەکەین

ئاڤا نیوز

لە شاری هەولێر خاوەن شووقەکانی پرۆژەی ئالان تاوەر گردبوونەوە و دەڵێن لە ساڵی 2013 ـەوە كاركردن لە پڕۆژەكە وەستاوە و تاوەكوو ئێستا شووقەكان تەواو نەكراون داوا دەکەن پڕۆژەکە تەواو بکرێت.

زانیاریی بەدەستهاتوو: کامەران عەبدولڕەحمان، نوێنەری خاوەن شووقەکانی پڕۆژەی ئاڵان تاوەر بە ئاڤای وت: ئێمە لە ساڵی 2011 شووقەمان لەم پڕۆژەیە کڕیوە، دەبوو ساڵی 2013 تەواو بکرێن، بەڵام تاوەكو ئێستا شووقەکان لەو پڕۆژەیە تەواو نەكراون، دەشڵێت: هەشت بۆ نۆ دەفتەرمان بە خاوەنی پڕۆژەکە داوە و 12 ساڵە لە چاوەڕوانیداین.

بۆچوونی لایەنی بەرامبەر: سەردار ئاکرەیی، خاوەنی پرۆژەی ئالان تاوەر، بە ئاڤای ڕاگەیاند، هاوبەشەکەم حەوت ملیۆن دۆلاری بردووە و خۆی ون کردووە، بۆیە پڕۆژەکە ڕاگیراوە، دەستەی وەبەرهێنان کارەکانی پڕۆژەکەی ڕاگرتووە، چونکە ئەو کەسەی ڕایکردووە پارەی حكومەت قەرزارە، ئەگەر مۆڵەتم پێ بدرێت، پرۆژەكە لە سەر ئەستۆی خۆم تەواو دەكەم.

لێدوانی فەرمی: سامان عەرەب، بەرێوەبەری وەبەرهێنانی هەولێر، سەبارەت بە کێشەی پڕۆژەی ئالان تاوەر، بە ئاڤای ڕاگەیاند، لەگەڵ خاوەن یەكەكان دانیشتووین، نووسراویان بۆ وەزارەتی شارەوانی کردووە تاوەکو گرێبەستی ئەوە کەسە هەڵبوەشێندرێتەوە کە پڕۆژەکەی بەناوە، دەشڵێت: لە هەوڵداین بیدەین بە کەسێکی دیکە بۆ ئەوەی پڕۆژەکە تەواو بکات.