ئاڤای خەڵک؛ گەڕەکێک لە هەولێر ڕۆژانە تەنیا چوار کاتژمێر کارەبایان هەیە

ئاڤا نیوز

دانیشتووانی گەڕەکی هەولێری نوێ لە هەولێر دەڵێن ماوەیەکە کارەبای گەڕەکەکەیان خراپە، لە ڕێگەی ئاڤا داوا دەکەن بەدواداچوون بۆکێشەی کارەبای ئەو گەڕەکە بکرێت و گرفتەکەیان چارەسەر بکرێت.

زانیاریی بەدەستهاتوو: چەند هاووڵاتیەكی ئەو گەڕەکە بە ئاڤایان ڕاگەیاند، زیاتر لە هەزار ماڵ لە گەڕەكی هەولێری نوێ ڕۆژانە تەنیا چوار بۆ پێنج كاتژمێر كارەبامان هەیە.

لێدوانی فەرمی: کەمال عەساف، بەڕێوەبەری دابەشكردنی كارەبای دووی هەولێر بە ئاڤای ڕایگەیاند: کارەبای هەموو هەولێر و تەنانەت بەشێکی زۆری دەوروبەریشی 24 کاتژمێرییە، لە هیچ شوێنێک ئەو بڕە کەمە نەدراوە بە هاووڵاتیان، لە هەندێک گەڕەک بەهۆی لۆدی زۆرەوە کێشەی گۆڕەر هەیە، ئەویش زۆر دەگمەنە، دەشڵێت: لەم جۆرە حاڵەتانە پێویستە هاووڵاتیان ئاگادارمان بكەنەوە، بە دڵنیاییەوە بەدواداچوون بۆ گرفتەكە دەكەین و بە زووترین كات چارەسەری کێشەکەیان دەكەین.