یەکەمەکانی زانکۆی سەڵاحەددین بۆ خوێندنی ماستەر دەنێردرێنە ئیتاڵیا

ئاڤا نیوز

سەرۆکی زانکۆی سەڵاحەددین لە ڕێگەی دابینکردنی سکۆلەرشیپی هاوبەش یەکەمەکانی سەر ئاستی بەشەکان بۆ خوێندنی ماستەر دەنێرێتە زانکۆ بەناوبانگەکانی ئیتاڵیا، بۆ بەدەستهێنانی بڕوانامەی خوێندنی باڵا.

لێدوانی فەرمی: سامان عەبدوڵڵا، بەڕێوەبەری ڕاگەیاندنی زانکۆی سەڵاحەددین، بە ئاڤای ڕاگەیاند: ئەم سکۆلەرشیپە هاوبەشە سەرجەم دەرچووە یەکەمەکانی گشت بەشە زانستیی و مرۆڤایەتییەکانی زانکۆی سەڵاحەددین بۆ ساڵی ئەکادیمیی خوێندنی 2024-2025  دەگرێتەوە.

زانیاریی  زیاتر: بەڕێوەبەری ڕاگەیاندنی زانکۆی سەڵاحەددین، دەڵێت: لەماوەی ڕابردوو لەسەر ڕاسپاردەی سەرۆکی زانکۆی سەڵاحەددین، یاریدەدەری سەرۆكی زانکۆ بۆ کاروباری زانستی و خوێندنی باڵا سەردانی وڵاتی ئیتاڵیای کرد، بەمەبەستی هەماهەنگیی ئەکادیمیی زانستی چەندین کۆبوونەوەی گرنگی لەگەڵ دوو سەرۆک زانکۆی ئیتاڵی ئەنجامدا، بەتایبەتی زانکۆی پاڤیا و زانکۆی ڕۆژهەڵاتی پیدمۆنت لە نۆڤارا، لەسەردانەکەدا دوو یاداشتنامەی لێکتێگەیشتن واژۆکران، بڕیاردرا قوتابیانی ساڵی 2024-2025 بۆ خوێندنی ماستەر سەردانی ئەم زانکۆیانە بکەن.

ئەوەی پێویستە بیزانیت: کرێی خوێندنەکە لە ئەستۆی زانکۆی سەڵاحەددین دەبێت، بەڵام تێچووی گەشت و مانەوە لە ئەستۆی قوتابی دەبێت. 

کاندیدە شایستەکان دەتوانن داواکاری پیشکەش بکەن لەرێگای پڕکردنەوەی ئەم فۆرمە.