بەرپرسانی ئەمریکا و ڕووسیا کۆدەبنەوە

ئاڤا نیوز

بە ئامانجی گەیشتن بە ڕێککەوتنێک بۆ کۆتاییهێنان بەشەڕی ڕووسیا و ئۆکرانیا، بڕیارە جارێکی دیکە شاندی ئەمریکا و ڕووسیا کۆببنەوە.

زانیاریی بەدەستهاتوو: بەرپرسێکی کۆشکی سپی ئاشکرای ڕایگەیاندووە، بەرپرسانی ئەمریکا و ڕووسیا لە کۆتایی ئەم هەفتەیەدا لە شاری میامی لە ویلایەتی فلۆریدا کۆدەبنەوە بۆ گفتوگۆی نوێ سەبارەت بە پلانی دۆناڵد ترەمپ، سەرۆکی ئەمریکا بۆ کۆتاییهێنان بە شەڕی ئۆکرانیا.

زانیاریی زیاتر: لەم هەفتەیدا شاندی ئەمریکا و ئۆکرانیا و لەگەڵ بەرپرسانی ئەوروپا لە بەرلین کۆبوونەوە، لایەنی ئۆکرانی لەبارەی دانوستانەکانەوە وتی، پێشکەوتنی باش بەدەستهاتووە.

ئەوەی لەبارەیەوە دەگوترێت: تاوەکو ئێستا کۆشکی سپی ئاشكرای نەکردووە شاندەکە لە کێ پێکهاتووە، بەڵام بەپێی هەواڵێکی ماڵپەڕی پۆلیتیکۆ، پێشبینی دەکرێت جارێد کوشنەر، زاوای ترەمپ و ستیڤ ویکتۆف، نێردەی ترەمپ بەشداربن، هاوکات لایەنی ڕووسی بڕیارە کیریل دیمیتریڤ، نوێنەری پووتین بۆ پرسە ئابوورییەکان کەسێک بێت لە شاندەکە.

لەلایەکی دیکەوە: ڤلادێمیر پووتین، سەرۆکی ڕووسیا ئاماژەی بەوە کردووە، ئەگەر بە دیپلۆماسییەت نەگەنە ئامانجەکانیان ئەوا  بە شەڕ بەدەستیان دەهێنن.