تورکیا نیازی هەیە دەستبەرداری سیستمی بەرگریی ئاسمانیی ئێس 400 ڕووسی بێت

ئاڤا نیوز

 

بە ئامانجی باشترکردنی پەیوەندییەکانی لەگەڵ ئەمریکا، تورکیا بەدوای ڕێگایەکدا دەگەڕێت بۆ گەڕاندنەوەی سیستمی بەرگریی ئاسمانی ئێس 400 کە لە ڕووسیا دروستکراوە.

 

بڵاوکراوەی فەرمی: ئاژانسی بلومبێرگی ئەمریکا لەزاری چەند سەرچاوەیەک ئاشكرای کردووە، تورکیا بیر لە وازهێنان و گەڕاندنەوەی سیستمی بەرگریی ئاسمانی ئێس-400 ڕووسی دەکاتەوە، کە نزیکەی 10 ساڵ لەمەوبەر  لە مۆسکۆی کڕیووە.

 

بۆچی گرنگە: ئامانج لەم هەنگاوەی تورکیا باشترکردنی پەیوەندییەکانی نێوان ئەنقەرە و واشنتنە، ئەم هەنگاوە دەتوانێت "دەرگا بەڕووی ئەنقەرەدا بکاتەوە بۆ ئەوەی جارێکی دیکە پەیوەندی بە پرۆگرامی فڕۆکەی جەنگی ئێف-35 بە سەرکردایەتی ئەمریکاوە بکاتەوە".

 

زانیاریی بەدەستهاتوو: بە گوتەی سەرچاوەکان کە بە بلومبێرگیان ڕاگەیاندووە، ڕەجەب تەیب ئەردۆغان، سەرۆککۆماری تورکیا پرسی ئێس-400ـی لەگەڵ ڤلادیمیر پووتین، سەرۆکی ڕووسیا تاوتوێ کردووە لەمیانی کۆبوونەوەی هەفتەی ڕابردوو لە تورکمانستان.

 

ئەوەی لەبارەیەوە دەگوترێت: تاوەکو ئێستا بەرپرسانی تورکیا لەسەر ئەم پرسە لێدوانیان نەداوە، کرێملینیش هەواڵەکە ڕەت دەکاتەوە و دەڵێت: لەکاتی دانوستانەکانی نێوان پووتین و ئەردۆغان هیچ داواکارییەکی لەو شێوەیە نەکراوە.