زیاتر لە 850 هەزار ئاوارە و پەنابەر لە هەرێمی کوردستان دەژین و خەرجی ساڵانەیان 209 ملیۆن دۆلارە

ئاڤا نیوز

 

بەپێی ئامارەکانی ناوەندی هاوبەشی هەماهەنگیی قەیرانەکان زیاتر لە 850 هەزار پەنابەر و ئاوارە لە هەرێمی کوردستان نیشتەجێن و خەرجی ساڵانەیان  209 ملیۆن دۆلارە.

وێنە گەورەکە: لە 10 ساڵی ڕابردوودا بەهۆی تێكچوونی دۆخی ئەمنیی سووریا و پارێزگاكانی خوارووی عێراق، هەرێمی کوردستان باوەشی بۆ زیاتر لە دوو ملیۆن ئاوارە و پەنابەر کردەوە، لە دەیان کەمپدا خزمەتگوزارییەکانیان پێشکەش كرا و ئیستا نزیکەی ملیۆنێک ئاوارە و پەنابەر لە 27 کەمپدا ماونەتەوە و حکومەتی هەرێمی کوردستان ساڵانە ئاسانکاری دەکات بۆ ئەوەی بگەڕێنەوە سەر ماڵ و حاڵی خۆیان.

 

لێدوانی فەرمی: سروە ڕەسوڵ، بەرێوەبەری ناوەندی هاوبەشی هەماهەنگیی قەیرانەکان بە ئاڤای گوت، هەرێمی کوردستان لە سەختترین کاتدا خۆی خستە ژێر بەرپرسیارێتییەکی گەورە و پەنابەر و ئاوارەکانی گرتە ئەستۆ و بەوپەڕی تواناوە لە دەیان کەمپ خزمەتگوزارییەکانی پێشکەشی ئاوارەکان کرد.

 

-وەزارەتی کۆچ و کۆچبەرانی عێراق کەمتەرخەمە بەرامبەر ئەو بابەتە و وەک پرسێکی مرۆیی سەیری ناکات بەڵکوو وەک پرسێکی سیاسی مامەڵەی لەگەڵدا دەکات، هەوڵی چارەسەرکردنی کێشەی ئاوارەکان نادات بۆ ئەوەی بگەڕێنەوە سەر ماڵ و حاڵی خۆیان، حکومەتی عێراق پابەندی بڕگەکانی ڕێکەوتننامەی شنگال نەبووە.

 

- کریستایەنەکان هەرێمی کوردستانیان بۆ ژیان هەڵبژاردووە وەک لانەیەکی ئارام و ناگەڕێنەوە شارەکانی عێراق چونکە ژیانیان ناپارێزریت.

ئامارەکان وا دەڵێن: پەنابەر و ئاوارەکان هەڵگری ڕەگەزنامەی تورکیا، سوریا و ئێرانن، بەپێی ئامارەکانی ناوەندی هاوبەشی هەماهەنگیی قەیرانەکان بۆ ساڵی 2025 ئاماری ئاوارە و پەنابەران بەم شێوەیە:  

-855,692 ئاوارە و پەنابەر هەن 
 -574,228 ئاوارە هەن 
-281,464 پەنابەر هەن

دابەشبوونی جوگرافیای ئاوارە  و پەنابەرەکان  بەم شێوەیەیە:

هەولێر؛ 339,263 ئاوارە و پەنابەر

دهۆک؛ 381,101  ئاوارە و پەنابەر

سلێمانی؛ 135,328 ئاوارە و پەنابەر

 

-بەسەر 27 کەمپدا دابەشبوون و خەرجیی ساڵانەیان 209.041.560  ملیۆن دۆلارە.