پەرلەمانتارێک هێرش دەکاتە سەر حکومەتەکەی سوودانی: وڵاتی لە قەرزدا نوقوم کردووە

ئاڤا نیوز

ئەندامێکی خولی پێنجەمی پەرلەمانی عێراق دەڵێت، حکومەتی عێراق هەرچەندە 64 تريليۆن دينار کورتهێنانی هەیە، بەڵام دەستی کردووە بە خەرجی و زیادکردنی پابەندی دارایی لەسەر خۆی، بەمەش وڵاتی  لە قەرزدا نغرۆ کردووە.

 

هۆکارە زانراوەکان: لە بودجەی عێراقدا نرخی هەر بەرمیلێک نەوت بە 70 دۆلار خەمڵێنراوە و بەوجۆرەش کورتهێنان دەیان تریلیۆن دینارە، بەڵام لە ئێستادا نرخی هەر بەرمیلێک نەوت بە دەورووبەری 60 دۆلارە، واتە کورتهێنان لەوەی لە بودجەشدا دانراوە، زیاترە، بەوەش حکومەتی عێراق ناچار بووە زیاتر سەرنجی لەسەر دابینکردنی مووچە بێت و پارەی زۆرینەی هەرە زۆری پڕۆژەکانی ڕاگرتووە.

 

ڕاگەیێنراوی فەرمی: محەممەد خەفاجی، ئەندامی خولی پێنجەمی پەرلەمانی عێراق لە ڕاگەیێنراوێکدا دەڵێت، ئەمساڵ کورتهێنانی بودجەی عێراق 64 تريليۆن دينار بووە کە دەکاتە 32%ی کۆی بودجە، بەجۆرێک بودجە بە 200 تريليۆن دينار خەمڵێنراوە لەکاتێکدایە بە کرداری بودجەکە کەمتر لە 136 تريليۆن دينارە.

 

دەشڵێت، حکومەت بە حسابی خۆی داهاتی 200 تريليۆن دينارە بۆیە دەستی کردووە بە خەرجی و زیاد کردنی پابەندی دارایی، بەپاساوی ئەوەی کورتهێنان لە بەرزبوونەوەی نرخی نەوت، قەرزکردن و زیاد کردنی داهاتی نانەوتی (باج و گومرگ) پڕ دەکاتەوە، بەوەش وڵاتی لە قەرزدا نغرۆ کردووە و دەستکەوتی وەهمی بە خەڵک دەفرۆشێتەوە.